Balak Sa Semana: Mga Mata Sa Pagtuo
UNSAY giduol adtong tawhana, Delphia?” ni Lola Phila sa iyang apo nga naghuwat kaniya sa sementong lingkoranan sa may mantalisayan daplin sa pribadong karsada atbang sa kombento. Nasiklapan man kini niya ganina nga giduol ni Kago samtang nakighangop pa siya sa kaubang mga lector sa simbahan pagkahuman sa unang misa sa Bendita sa Lukay kon unsay mga kalihokan nila rong Semana Santa ug kon apil ba siya sa pagbasa sa pasyon ni Ginoong Hesukristo sa Biyernes Santo.
“Nangutana ra, La, kon unsay ngalan nako. Karon pa man god kuno siya kakita nako dinhing dapita,” matod ni Delphia nga karon pa tuod makabakasyon sa iyang lola dinhi sa probinsiya sukad migradwar na siya sa grade 12 didto sa Abellana National School.
“Palay-i tong tawhana, Delphia, ha. Kon moduol siya nimo, lakaw dayon bisag naa pa siya sa mga usa ka gatos ka metro gikan nimo,” ni Lola Phila nga pinakagot ang pipila ka pirasong bag-ang. Nahabilin pong iyang pustiso sa banggera sa ilang balay tungod sa pagdinali-dali ganiha aron dili maulahi sa misa.
“Grabe si Lola.” Nahikatawa si Delphia. “Ngano man, La? Unsay sala niya nimo?”
“Apostoles to siya,” mubong tubag ni Lola Phila. Diha na man goy mihunong nga traysikol.
“Palay-an kay apostoles? Ngano man kuno?! Pari hinuon kay dili puydeng magminyo. Lola, uy… makalibog man,” bagulbol ni Deplhia samtang kamulong sakay sa traysikol.
“Unsay gibagulbol nimo diha?” ni Lola Phila.
“Wa, La, uy! Nagpraktis ra kog beatbox,” bagutbot ni Delphia ug mingisi. Milarga na ang traysikol.
MAPUGSANON ang panuktok. “Delphia, mata na diha aron manilhig na sa tugkaran, manglimpiyo sa balay!” singgaak ni Lola Phila.
“Sayoha pong mamukaw nimo, La, uy! Alas singko pa
gani sa kaadlawon.” Nagmugtok si Deplhia human matan-aw ang alarm clock. Mibangon siya. “Kinsa may moabot nga bisita, La, nga manglimpiyo man ta sa tugkaran ug sa sulod sa balay?” ni Delphia nga giduka pa samtang miguwa sa iyang kuwarto. Nanglugod siya sa mata.
“Suroy ron sa mga apostoles sa atong dapit. Mamendita sila sa kabalayan,” ni Lola Phila nga nagsugod nag panglimpiyo sa altar sa sala ug namutang og bag-ong kinutlo nga mga buwak.
Paglabay sa pipila ka takna…
“Delphia, dagkoti nang mga kandela sa altar kay nia na ang mga apostoles,” ni Lola Phila kansang tingog naglukim og kahimuot.
Misanong dayon si Delphia.
Nag-ampo ang mga apostoles sa ganghaan sa ilang balay. Unya, misulod sila ug namendita uban ang pagawit sa “Diyos Namo Sa Kaluoy”. Ug unya nag-ampo sa altar. Pagkahuman, nakita ni Delphia nga malipayon kaayong nakigkabildo ang iyang Lola Phila sa mga apostoles uban sa pagtunol sa halad nga kuwarta dayong ingon: “Pangaon sa mo, Dong!”
“Busog pa kaayo mi, La. Bag-o pa ming namahaw sa kombento. Ari sa mi.” Ug nanggawas ang mga apostoles sa ilang balay.
“Maayo man lagi ka motagad adtong mga apostoles, La?” ni Delphia nga gisanapan sa kahibulong.
“Aw, mga apostoles god to sa Ginoo,” daling tubag ni Lola Phila.
“Unya, nganong suko man kaayo kang Kago nga apostoles man pod kaha to?” ni Delphia.
“Lahi to iyang pagka apostoles. Nakakita bitaw ka, wa si Kago adtong dose ka apostoles ganiha. Apos tulisan man tos Kago, Delphia,” ni Lola Phila. “Nagpakatawa si Lola, oh.” Mingisi si Delphia.
“Tuo na lang nako, Delphia. Palay-i gyod na si
Kago. Naibog ra ba to nimo, sa tan-aw lang nako. Kaila ko sa apohan adtong Kago. Kon di ka motuo, anaa ra kana nimo.”
Nahilom si Delphia. Nahinumdom siya sa kasinatian sa gugma sa iyang Lola Phila. Kon tinuod bang tulisan ang apohan ni Kago, maglisod siya pagtuo.
Migitli ang iyang pahiyom ni Delphia nga nagtanaw sa nagwiri-wiri nga sigyab sa kandela sa altar ug sa nangalimyon nga preskong buwak nga gihalad sa Santo Kristo. (KATAPOSAN)
Gidid-an ni Lola Phila ang iyang apo nga si Delphia nga makigsuod kang Kago. Sa unsang hinungdan?