LOKOHIN N’YO LELONG N’YO
Tatlumpu’t dalawang taon. Ganyan katagal nang pinagloloko o nagpaloko ang militar sa mga komunista nang pumayag ito sa kasunduan na magpaalam muna sa opisyales ng Universidad ng Pilipinas bago pumasok sa campus nito at bago umaresto ng suspect na nasa loob nito. Sa ilalim din ng 1989 DND-UP Accord ay bawal ang militar o pulis na sumita at bumuwag ng mga nagpo-protesta sa campus.
Malaki ang pananagutan ng militar maging ng kapulisan sa nasabing kasunduan na nagbigay-daan sa talamak na pagre-recruit ng mga estudyante upang sumanib sa New People’s Army at palakihin ang hanay ng mga rebelde.
May pananagutan sila sa mga magulang ng estudyanteng nagpa-brainwash sa mga brainwashed na recruiter ng NPA dahil nawala ang kanilang mga anak o namatay sa engkwentro ng mga sundalo at rebelde sa bundok o gubat.
May pananagutan sila sa mismong estudyante na dapat sana ay prinotektahan nila laban sa mga masasamang-loob.
May pananagutan din ang mga lumagda sa kasunduan at mga nagpatupad nito sa nakalipas na 32 taon sa pamilya ng mga sundalong pinatay ng mga dating estudyanteng taga-UP na naniwala sa ideyolohiyang gapiin ang mga alagad ng pamahalaan upang magwagi sa digmaan ng mga recruier nila at makapagtayo ng komunistang gobyerno para sa mga NPA.
May pananagutan sila sa sarili nilang institusyon sampu ng kanilang kasundaluhan sa pagbibigay nila ng dagdag na banta sa katauhan ng mga bagong NPA na sasagupa sa kanila.
May pananagutan sila sa lipunan dahil naging silent partner sila ng NPA sa pagtataguyod ng child soldiers tulad ng mga front na iskwelahan ng mga lumad na sa kabutihang-palad ay naipasara na nila.
Of course, may parehong pananagutan ang mga opsiyal ng UP at iba pang pamantasan sa bansa na nagpahintulot sa mga NPA na magrecruit ng ilang estudyante nila na sumama sa NPA. Lumalabas na hinayaan nila na gastusan at tustusan ng pamahalaan ang ilang isko at iska na bumaril ng sundalo, pulis o sibilyan.
Nito lang nakalipas na linggo, apat na sundalong hindi naka-uniporme ang tinambangan ng mga NPA habang nagmomotorsiklo sa highway sa Legazpi City, Albay. Galing sila sa pulong sa lokal na pulis para sa gagawing operasyon laban sa mga NPA sa lugar. Hindi pa natutukoy ang mga pumaslang sa kanila ngunit maaaring sila’y bagong recruit mula sa unibersidad o lumad na na-brainwash na labanan ang militar.
Tama lamang na ituwid nila ang malaking pagkakamali nila sa pagbabasura ng accord. Tama lamang na gumising na sila sa bangungot at tapusin na nila ang panloloko sa kanila ng mga recruiter ng NPA. Kung hindi na sila magpapaloko, malamang wala na ring malolokong estudyante ng UP at iba pang pamantasan na sumanib sa NPA.