DELTA VARIANT, KUMITIL NG TATLO – DOH
Kinumpirma ng Department of Health (DoH) nitong Lunes na tatlo sa mga nahawahan ng coronavirus disease (COVID-19) Delta variant – na pinaniniwalaang mas nakakahawa at mas potent na virus -- ang namatay ayon sa kanilang tala.
Ayon kay Health Undersecretary Maria Rosario Vergeire, ang pinakahuling namatay ay isang 58-anyos na babae mula sa Pandacan sa Maynila na naitala noong Hunyo 28, habang ang dalawang iba pa ay isang 78-anyos na babae mula sa Baybay, Antique at isang 63-anyos na lalaking miyembro ng MV Athens crew.
Nilinaw rin ng DoH official na ang lahat ng mga Delta variant carriers sa bansa ay naka-quarantine na at patuloy na inoobserbahan.
“All delta variant cases are immediately re-assessed to determine their current clinical, laboratory, and isolation status. They shall be swabbed for repeat RT-PCR at end of their isolation or upon determination that they were positive for the Delta variant,” saad ni Vergeire.
“They shall remain in isolation while awaiting results. Those whose RT-PCR is negative, already asymptomatic, and have completed the minimum 10-day isolation may be discharged from isolation,” dagdag niya.
Paliwanag pa ni Vergeire, tinitingnan na ng pamahalaan ang mga contact tracing results ng mga nasabing kaso “to identify RT-PCR positive close contacts whose samples may be eligible for sequencing.”
Kasunod ito nang makumpirma ng DoH na labing-isang Pinoy na walang travel history ang nagpositibo sa mas nakakahawang COVID-19 strain.
Ang Delta variant ay napagalamang mas nakakahawa dahil sa tinatawag na “L452R” mutation na mas resistant umano sa immune system ng tao at mas mabilis ang pagkalat.
Sa pinakahuling tala, nasa 35 na Pinoy na ang nahawa ng Delta variant na unang nadiskubre sa India.