INGAT PA RIN ANG KAILANGAN
Kahit nagdiriwang na ang bansa ngayong Kapaskuhan, hindi pa rin tumitigil ang ating mga health workers at medical practitioners sa pagpapaalala sa publiko na sumunod pa rin sa mga ipinatutupad na health at safety protocols.
Hindi pa rin naman kasi nawawala ang banta ng coronavirus disease pandemic, lalo na ngayong naglalabasan pa rin ang mga variants na pinaniniwalaang mas nakakahawa pa.
Ayon sa ilang eksperto, kailangan pa rin umanong magsuot ng masks dahil sa banta ng BF.7 omicron subvariant lalo na sa mga lugar na mataas ang tsansa ng hawahan ng COVID-19.
Bagama’t optional na lang ang pagsusuot ng face sa karamihan ng indoor at outdoor settings, may paalala si Philippine College of Physicians president Diana Payawal.
“Kung marami pong tao kung closed ‘yung area at mababa ‘yung ceiling ina-[advise] po namin na kayo pa rin ay mag-face mask,” saad ni Payawal..
Sundin pa rin aniya ang social distancing at maghugas ng kamay kung kinakailangan para makaiwas sa sakit.
“Wear your mask when it’s crowded... sana ay sundin pa rin natin ang health protocols,” dagdag pa niya.
Ngayong nagluwag na ang mga alert level restrictions sa bansa, hindi naman masama kung susunod pa rin tayo sa mga health protocols dahil kailangan na nating iwasan ang pagtaas ng mga maitatalang kaso ng COVID-19 sa bansa.
Malaking hirap na ang hinarap ng ating mga frontliners sa pagpigil na kumalat ang nakamamatay na sakit, kaya sana ay huwag nating sayangin ang kanilang mga naging sakripisyo upang masigurong lahat ng Pilipino ay magiging ligtas sa sakit.
Wala naman sigurong mawawala kung patuloy pa rin tayong magsusuot ng mask, dahil para rin naman ito sa proteksyon ng lahat.