BAGONG PAG-ASA
Hindi maikakailang ang taong 2022 ay naging kontrobersyal lalo na pagdating sa mga nangyari sa buong taon na talaga namang gumimbal sa lahat.
Nariyan na ang pagtaas ng bilang ng kasong rape at sunodsunod na kidnapping sa iba’t ibang lugar sa Pilipinas. Ilang mga magulang din ang naalarma kaya mas pinaghihigpitan nila na lumabas at gumala ang kanilang mga anak.
Nariyan rin ang hindi maaawat na pagtaas ng presyo ng krudo at mga bilihin.
Nakita rin nating ngayon taon ang ang pagbabago ng administrasyon kung saan hinirang si Ferdinand Marcos Jr. bilang bagong Pangulo ng bansa.
Hindi rin nakaligtas ang taong ito sa mga krimen, gaya nang pamamaril sa dating mayor ng Lamitan City, Basilan na si Rose Furigay maging ang kaniyang bodyguard at isang security personnel ng naturang paaralan, noong Hulyo 24, samantalang sugatan naman ang anak nitong si Hanna Rose.
Nariyan rin ang pagpatay sa broadcaster at komentaristang si Percival Mabasa o mas kilalang si ‘Percy Lapid’ matapos barilin sa loob mismo ng kanyang kotse, sa Las Piñas City noong Oktubre 3.
Pinaniniwalaan naman ng pamilyang naiwan ni Percy Lapid na posibleng ang kaniyang trabaho bilang mamamahayag ang dahilan kung bakit binaril ito. Nakapagsagawa pa umano ng kaniyang programa si Lapid, kung saan binanatan niya sina dating Pangulong Rodrigo Duterte at Lorraine Badoy sa ginagawa umano nilang “red-tagging.”
Pero hindi naman lahat ay nakagigimbal, dahil dalawang araw bago pumasok ang Bagong Taon, hinirang ng 2022 End of Year Survey ng Gallup International Association ang Pilipinas bilang ang pinakamasayang bansa sa bansa.
Iyan ay sa kabila nang mga hirap na nararanasan ng mga Pinoy ngayong taon.
Pinangunahan ng Pilipinas ang survey sa score na 75 percent at sinundan ito ng Mexico, Malaysia, Afghanistan at Ecuador.
Ngayon pagpasok ng 2023, nananalangin kami na masolusyunan na ang lahat nang hinaharap na problema ng ating mga kababayan at ang Bagong Taon ay nagbabadya rin ng isang panibagong simula.
Salubungin natin ito kalakip ng pag-asang magiging maayos rin ang lahat.
Manigong Bagong Taon, mga Ka-Tribu!