CARLA ABELLANA, CERTIFIED SURVIVOR

Aminado ang aktres na si Carla Abellana na talagang naging challenge sa kanya ang taong 2022 dahil sa dami nang pinagdaanan niya noong nakaraang taon kabilang na ang kontrobersyal na paghihiwalay nila ng kanyang ex-husband na si Tom Rodriguez.

Marami nga ang nagsasabi na kung mahina-hina lang ang loob ni Carla, malamang daw ay bumigay na ito sa extra challenge na hinarap niya last year.

Ilang netizens rin ang nagpoint-out na ilang buwan lamang ang itinagal ng buhay may-asawa ng dalawa pagkatapos ng mahigit pitong taon bilang magkarelasyon at magpakasal noong October, 2021.

Pero ayon nga kay Carla, sinusubukan na niya ngayong mabuhay uli nang normal at masaya habang unti-unting nakaka-recover mula sa mga mapapait na karanasan noong 2022.

Sa kanyang IG, nagpahiwatig ang aktres na patuloy pa rin ang kanyang “healing process” at very proud niyang masasabi na napagtagumpayan niya ang mga ibinigay na pagsubok sa kanya ng tadhana.

“This year i was forced to face the most broken and shattered version of myself. But also meet the survivor i had turned into, who is slowly embracing grace,” sabi ni Carla.

Maraming netizens ang nakisimpatya sa kanyang mga pinagdaanan kasabay ng pagbati sa kanya ng “happy new year.” Sinagot naman ni Carla ang ilan sa kanyang IG followers at nagpasalamat sa patuloy na pagsuporta sa kanya.

Maraming espekulasyon ang naglabasan tungkol sa tunay na dahilan ng paghihiwalay ng dating celebrity couple kabilang na ang isyu ng third party sa panig ni Tom.

Sa naging rebelasyon naman ni Carla, matindi raw ang ginawang “pambabastos, panloloko, pandudurog, paninira, panggagamit at pagtataksil” sa kanya ni Tom. At ang mas masakit pa raw ay nang madamay na pati ang kanyang pamilya.