MAY PANGAMBA PA RIN

Matapos ang pahayag ni Pangulong Ferdinand Marcos Jr. na hindi na umano pipigilan ng China ang mga Pilipinong maghanapbuhay sa West Philippine Sea, may ilang mga mangingisda pa rin ang ang nangangamba na hindi ito masusunod.

Nitong nakaraan lamang kasi, may ilang mangingisda ang nagsabing limitado lang ang pagkilos ng mga Pilipinong mangingisda sa Scarborough Shoal sa West Philippine Sea.

“Ang pinapapasok lang nilang bangka doon, yung mga maliliit. Pero yung mga mother boat, na sa panahon kagaya ngayon na malakas ang amihan, malakas ang hangin---lalaki ang aalon, napaka-vulnerable pa rin nito doon sa mga mother boat na hindi makapagtago doon sa loob ng mismo ng shoal,” saad ng isang mangingisda mula sa Masinloc, Zambales.

Ang mother boat ay ang mga malalaking bangka kung saan isinasakay ng mga mangingisda ang mas maliliit nilang bangka at ang kanilang huli.

“Halimbawa, sumama po kami sa mother boat, yung mga maliliit na bangka, para isasakay para papunta doon, pagdating doon saka mangingisda, yung mga maliliit na bangka lang ang pwedeng makalapit,” ayon pa sa mangingisda. “Hindi ka makalapit doon hanggang mga 2 milya.”

Ayon pa sa kanya, sana ay mapatupad ng pamahalaan ang kanilang kalayaang makapaghanapbuhay na muli sa mga katubigan ng Pilipinas.

“Malaking kawalan sa mga mangingisda yung pagkaano doon sa Sacrborough dahil ito yung talagang malalaking pinagkukunan natin ng mga iba’t ibang isda na, magagandang isda,” saad ng mangingisda.

Balido ang panawagan ng ating mga mangingisda, dahil ang karagatang nasasakop ng Pilipinas lamang ang maari nilang pagkuhanan ng kanilang ikabubuhay.

Sana lamang ay matugunan na ng pamahalaan ang nagpapatuloy na problema na ito.