HUHULIHINNA
Mukhang madadagdagan na naman ang pasanin ng ating mga kababayang jeepney drivers na hindi pa kasama sa consolidation sa ilalim ng Public Utility Vehicles Modernization Program dahil bukod sa patuloy ang pagtaas ng presyo ng krudo, malaki ang posibilidad na hindi na makakabiyahe ang mga ito.
Nitong nakaraan kasi ay nagpulong na ang mga opisyal ng Land Transportation Office para sa paghihigpit sa paghuli sa mga hindi rehistradong sasakyan at mga kolorum, kabilang na ang mga pampasaherong jeepney na hindi nagconsolidate sa ilalim ng PUVMP.
Ayon sa LTO, paplantsahin na nito ang magiging latag ng kanilang programa kaugnay sa PUVMP simula sa Pebrero.
Kung matatandaan, sinabi ni LTO chief Assistant Secretary Vigor Mendoza II na magbubukas sila ng karagdgang mga impounding facilities sa iba’t ibang panig ng bansa dahil sa inaasahang pagdami ng mga mahahatak na sasakyan.
Batay sa datos ng LTO, umabot na sa 24,366 ang naka-impound na mga pribado at pampublikong sasakyan sa mga regional offices ng LTO, kabilang dito ang 359 na sasakyan sa LTO impounding area sa Quezon City.
Una nang ipinaalala ni Mendoza ang mabigat na multa at kasong nag-aabang sa mga mahuhuling kolorum na jeepney.
“‘Pag colorum, there are two sets of penalties, 1 yung penalty, administrative fine nila, so P50,000, may P200,000, may P1 million, depende kung anong sasakyan. Meron ding criminal liability yan, ‘tas up to P3 million fine,” sabi ni Mendoza.
“Pag hinuli mo ang sasakyan because of unregistered motor vehicle or colorum, yung lisensiya ng driver kumpiskado po yan. The driver will be prosecuted criminally. Basta colorum po yan, pag unregistered naman suspendido lisensiya niya,” dagdag pa niya.
Kaya payo lamang sa ating mga kababayang jeepney drivers, sana ay makagawa na kayo ng paraan upang mapabilang na sa consolidation.
Para naman sa LTO, dapat ay magkaroon kayo ng puso at unawain ang kalagayan ng ating mga jeepney drivers na siguradong maapektuhan ang kabuhayan at buhay nila at ng kanilang mga pamilya.