SENADO NAIS MAG-IMBESTIGA SA PAGKAWALA NI CAMILON

Inihayag ni Senador Raffy Tulfo na nais niyang maimbestigahan sa Senado ang nangyaring pagkawala ng local beauty queen ng Tuy, Batangas na si Catherine Camilon.

Batay sa Senate Resolution 913 na inihain ni Tulfo, nakasaad na nais din niyang maimbestigahan ang pagkakasangkot ng mga pulis sa mga karumal-dumal na krimen.

“The involvement of police officers in heinous crimes [has] been increasing in the past months and there is a need to review the screening process of police officers as well as the retention of officers in active duty,” saad ni Tulfo.

Pangunahing suspek sa pagkawala ni Camilon si dating Police Major Allan de Castro, na sinibak na sa serbisyo nitong nakaraang buwan at ayon sa mga paunang imbestigasyon, lumilitaw sa imbestigasyon ng pulisya na may relasyon sina Camilon at de Castro.

Ang naturang pakikipagrelasyon ni de Castro kay Camilon kahit may pamilya na ang una ang dahilan kaya sinibak siya sa serbisyon.

Kahit umano inamin ni De Castro sa pulisya na may relasyon sila ni Camilon, itinanggi naman niya na may kinalaman siya sa pagkawala ng biiktima.

Kung matatandaan, huling nakita si Camilon sa isang mall sa Batangas noong Oktubre 12, 2023.

Ayon kay Tulfo, nais din niyang maimbestigahan ang pangyayari sa pagkawala ni Camilon, “for her family to gain swift justice.”

Nagsasagawa ng preliminary investigation ang piskalya sa Batangas City kaugnay sa mga reklamong kidnapping and serious illegal detention na inihain laban kay De Castro gayundin sa kaniyang driverbodyguard na si Jeffrey Magpantay, at dalawang iba.

Ayon sa mga saksi, nakita umano nila si Magpantay na nagmamando sa dalawang lalaki na may buhat na babaeng duguan at walang malay habang inililipat ng sasakyan.