PNG KA RIN BA?

Ang karaniwang binabansagang persona non grata o hindi tinatanggap na tao ay mga diplomatikong banyaga na pinaaalis dahil sa alitang pulitikal ng dalawang bansa. Ang karaniwang dahilan ng pagbabansag sa mga diplomatiko na PNG at pagpapatalsik sa kanila ay ang pang-e-espiya, pakikialam sa pamahalaan o pagsuporta sa kalaban ng pamahalaan.

Bukod sa mga diplomatikong banyaga, binabansagan ring PNG ang mga dayuhan na hindi maganda ang asta o pakikitungo sa mga Pilipino, pati na yung mga gumagawa ng krimen. Karaniwang ginagamit ito ng Bureau of Immigration at pinatatalsik nito ang mga binansagang PNG.

Ngunit lumawak na ang saklaw ng PNG ngayon. Naririyan si Pura Luka Vega, ang kontrobersyal na draq queen na pinakyaw ang bansag dahil 11 bayan, siyudad at probinsiya ang nagbawal sa kanya na dumayo sa kanilang lugar bilang PNG.

Binansagang PNG si Vega noong nakaraan taon ng mga opisyal sa Cebu City; Floridablanca, Pampanga; General Santos City; Toboso, Negros Occidental; Bukidnon; Dinagat Islands; Maynila; Cagayan de Oro, Nueva Ecija, Laguna at Occidental Mindoro. Itinuturing nilang blaspemiya o pambabastos kay Hesukristo ang ginawang pagtatanghal noong Hulyo ni Vega, na ang tunay na pangalan ay Amadeus Fernando Pagente. Sa kanyang palabas, inawit ni Vega ang Katolikong dasal na “Ama Namin” suot ang damit na pareho sa Itim na Nazareno. Maraming tagasimbahan ang nabastusan sa palabas at nagalit sa kanya nang makita nila ito sa social media.

Ang obispong si Leo Alconga kasama ang ilang pastor ay nagsampa rin ng reklamo laban kay Vega.

Sa ulat naman ng DAILY TRIBUNE tungkol sa hiwalayang Daniel Padilla at Kathryn Bernardo, PNG na rin umano ang turing ng aktres sa kanyang dating boyfriend at katambalan sa pelikula. Bunsod ito ng pahayag ni Bernardo na may pagpapasya na siya kung sino ang makakatambal niya sa pelikula matapos muling pumirma ng kontrata sa ABS-CBN. Sa dating kontrata niya bilang Kapamilya star, tila si Padilla lamang ang naging katambalan niya.

Kung anuman, hindi na nakakagulat na PNG na si Padilla kay Bernardo dahil sinaktan niya ang dalaga sa pagtataksil niya. Hindi naman siya nag-iisa dahil kasama niya si Vega na may ganoong bansag.

Kayo, PNG rin ba kayo?