TATAY NI TAYLOR SWIFT NANUNTOK UMANO NG PHOTOGRAPHER
Iniimbestigahan ng pulis sa Australia ang umano’y pagsuntok ng tatay ni Taylor Swift sa isang photographer sa mukha nang ang bituin at ang kanyang kasamahan ay bumaba sa isang yate noong mga madaling araw ng Martes ng umaga.
“Sinabi sa pulisya na isang 71-taong-gulang na lalaki ang umano’y sumalakay sa isang 51-taong-gulang na lalaki sa Neutral Bay Wharf mga alas 2:30 ng umaga, bago umalis sa lokasyon,” sabi ng tagapagsalita ng pulisya na si Alicia McCumstie sa Agence France-Presse.
“Iniulat ng nakababatang lalaki ang insidente sa North Shore Police Area Command na naglunsad ng imbestigasyon ng insidente.
Hindi pinangalanan ng pulis ang mga sangkot sa insidente, kabilang ang isang pulis na umano’y inatake rin ng matandang lalaki.
Ngunit nagpakilala ang photographer na si Ben McDonald at tinukoy niya ang nanuntok na si Scott Swift, ayon sa sa Agence France-Presse.
Sinabi ni McDonald na kinukunan niya ng larawan ang Amerikanang pop icon sa isang malaking yate sa Sydney Harbor habang nagdiriwang siya at kanyang mga tauhan sa huli niyang apat na konsyerto na pare-parehong dinumog ng mga tagahanga.
Ayon kay McDonald, may nagharang ng payong sa kanya habang kinukunan niya ng litrato si Taylor Swift na naglalakad sa jetty patungo sa isang naghihintay na sasakyan.
Pagkaalis ni Swift, isang lalaki ang humarap kay McDonald. “Sinutok niya ako sa chops,” sabi ni McDonald sa ginawa ng lalaki.
Unang akala niya ay mga agresibong tagabantay ni Taylor Swift ang nanuntok sa kanya.
“Ngunit tumingin ako sa mga larawan at nakita ko siyang magkahawakkamay kay Taylor, at ito ay ang kanyang ama,” sabi niya.
Ang isang tagapagsalita para kay Taylor Swift ay nagbigay ng salungat na kwento ng pangyayari. Sinabi niyang nagkaroon ng pagtulak at pagsalakay mula sa hindi pinangalanang mga tao sa tabing tubig.
“Dalawang indibidwal ang agresibong nagtutulak patungo kay Taylor, sinunggaban ang kanyang mga tauhan ng seguridad, at nagbabantang ihagis ang isang babaeng kawani sa tubig,” sinabi ng tagapagsalita sa AFP.
Ang kinatawan ni Swift ay hindi nagkomento sa umano’y pag-atake ng ama ng bituin, o tumugon sa mga kahilingan para sa karagdagang paglilinaw tungkol sa kung ano ang nangyari.