11 PINOY SEAFARERS IUUWI NA SA BANSA

Inihayag ng Department of Migrant Workers nitong Lunes na nakatakda nang ma-repatriate sa bansa ngayong Martes ang 11 Pilipinong seaferer na sakay ng cargo vessel na tinamaan ng missile attck ng Houthi rebels sa Gulf of Aden noong nakalipas na linggo.

Sinabi ni DMW officer-in-charge Hans Leo Cacdac na kasama sa mga marerepatriate ang 10 Pilipino na hindi nasugatan sa insidente at isang nagtamo ng injury.

Dagdag niya, may dalawang Pinoy seaferers na matinding nasugatan ang nanatili sa pagamutan habang ang mga labi ng dalawang tripulanteng Pinoy na nasawi sa pag-atake ay naiwan sa inabandonang cargo vessel at kasalukuyang nire-retrieve habang nagpapatuloy ang salvaging operation sa naturang merchant ship.

Sinabi rin ni Cacdac na tinamaan ng missile attack ng Houthis ang fuel tank ng barko kaya’t nasunog ito at dahil sa sobrang init, hindi pa agad mapasok ng team na itinalaga ng shipowner para isagawa ang salvaging operation kung saan target na marekober ang labi ng mga nasawi sa insidente.

Kung matatandaan, naglunsad ang Houthis ng missile attack noong Miyerkules sa Barbados-flagged ship na True Confidence na kinalululanan ng 15 Pilipinong seaferers, apat na Vietnamese at isang Indian national na kapitan ng barko.

Dagdag pa ni Cacdac, magbibigay ang Overseas Workers Welfare Administration ng tulong pinansyal sa mga Filipino seafarer na naapektuhan ng pag-atake

Iniutos din umano ni Pangulong Ferdinand Marcos Jr. ang whole of government approach para tulungan ang mga apektadong Filipino seafarers.