IBON MAN MAY LAYANG BUMOTO
Magsisimula na ang paggawa ng mga makinang gagamitin sa pagbilang ng boto sa pambansang halalan sa susunod na taon. Ang 110,000 vote counting machine ay gagawin sa South Korea, ayon sa Komisyon ng Halalan.
Nagsimula na rin ang pagrerehistro ng mga bagong botante, tanda ng paghahanda sa pagdaraos ng halalan para sa 12 mababakanteng puwesto sa senado at para sa pagpili ng mga bagong pinuno ng mga lokal na pamahalaan tulad ng alkalde at gobernador.
Malamang, naghahanda na rin ang mga kakandidato lalo na sa paglikom ng malaking pondo para sa pangangampanya o “pagligpit” sa inaasahang makakatunggali nila.
Naghahanda na ang mga imprenta at mga pabrika ng t-shirt na gagawa ng mga materyales sa pangangampanya.
Siyempre, abala ang Komisyon hindi lang sa pagkilatis ng mga ginagawang makinang pambilang ng boto sa halalan upang masiguro na hindi ito papalya at makakapandaya. Nagrerehistro rin ang ahensya ng mga bagong botante para sa darating na halalan. Alisto ang mga tauhan ng Komisyon upang hindi malusutan ng mga manlolokong nagpaparehistro, iyong mga tinatawag na double registrant o flying voter, at mga hindi karapat-dapat o hindi eligible na bumoto.
Alisto naman sila dahil hindi nila nirehistro ang mga menor de edad na nagpaparehistro bilang bagong botante sa Camp Abubakar sa Sultan Kudarat, Maguindanao del Norte nitong Martes.
Ayon kay Comelec chairman George Garcia, may mga 15 at 16 taong gulang ang nagtangkang magparehistro sa kampo na sa tingin niya ay maling naabisuhan na hindi para sa Sangguniang Kabataan ang registration doon. Hindi sila nirehistro dahil hindi pa sila maaaring bumoto sa regular na halalan.
Ginarantiya ni Garcia na hindi makakalusot ang mga ganoong modus dahil alam na nila ang mga teknik ng mga nananamantala. Sinabi niya na kung noon ay kahit ibon o kung sinuman ay nakakarehistro o nirerehistro sa isang lugar, hindi na iyon mangyayari.
Ang mga tauhan ng Comelec ay sinanay sa masusing pag-alam ng edad ng mga aplikante ng rehistrasyon at sa pagbeberipika ng mga dokumentong pinapakita ng mga nagpaparehistro kung tunay ang mga ito kaya hindi sila bastabasta malulusutan ng mga “sindikato” at nagtatangkang mandaya.
Sa madaling salita, walang ibon ang makakaboto. Makakalipad ito pero hindi ito mairerehistro bilang botante.