Agrikultura
HINDI lamang pera ang mahalaga sa isang tao. Mas mahalaga na nasisiyahan ka sa iyong ginagawa. Kagaya ni Dr. Daniel Farnacio, 55 anyos, na nagbitiw sa panggagamot apat na taon na ang nakararaan upang maging hardinero ng mga pambihirang ornamental plant o masetas at mga orkid.
Nagsilbi sa isang hospital sa New York sa Amerika sa loob ng pitong taon si Dr. Farnacio. Kung suweldo ang paguusapan, malaki ang kanyang kinikita. Umaabot sa $96,000 ang sahod niya sa isang taon. Sabagay, malaki rin ang buwis kaya nagneneto siya ng $56,000 lamang. Umaabot na rin iyan sa humigit kumulang na tatlong milyong piso.
Malaki nga ang sahod sa Amerika pero hindi naman nasisiyahan si Dan sa trabaho niya roon. Kaya minabuti na lang niya ang umuwi pagkatapos ng pitong taon. Nagtayo siya ng
nursery sa Baguio at sa Palaris, Asingan, Pangasinan. Nakapanayam namin si Dan sa nakaraang Hortikultura
garden show sa Quezon Memorial Circle sa Quezon City. Mayroon siyang puwesto sa Commercial Section at sumali rin sa kumpetisyon ng mga halaman sa mga eksibit. Napakasaya niya sapagkat ang kanyang variegated Tupidanthus ay nanalo ng First Prize sa kategorya ng Variegated na mga halaman. Maganda ang kanyang Tupidanthus. Malaki, umaabot na anim na piye ang taas at matingkad na dilaw at berde ang mga dahon na walang kagalos-galos. Noong makita ng isang mayaman na negosyante na mahilig sa pambihirang mga halaman, binili nito agad sa halagang P40,000.
Mayroon pa siyang mga halaman na nanalo rin sa ibang kategorya pero ang kanyang lubos na ipinagmamalaki ay ang kanyang Tupidanthus. Binili raw niya bilang isang maliit na halaman at inalagaan niya ng tatlong taon sa kanyang nursery sa Palaris, Asingan sa Pangasinan. May 6,000 metro kuwadrado ang kanyang nursery sa Palaris na nakabubong ng lambat upang hindi nakalantad sa maiinit na arawan ang mga halaman.
Ayon kay Dan, maingat na maingat siya sa pag-alaga ng kanyang Tupidanthus. Inilagay niya sa gitna ng nursery at nakapatong sa isang pedestal. Napaligiran ng iba’t ibang
halaman upang hindi masasagi at magalusan ang mga dahon. Ordinaryong “complete” fertilizer ang kanyang pinang-aabono para malusog.
Hindi lamang ang Tupidanthus ang pinagkakitaan ni Dan nang malaki sa Hortikultura. Nagdala siya ng maraming Cattleya mula sa kanyang nursery sa Baguio upang ibenta sa kanyang puwesto sa Commercial Section. Sa unang araw pa lamang, naubos na ang kanyang Cattleya. At ang mga may bulaklak ay nagkakahalaga ng mahigit na isang libong piso ang isa.
Paborito ni Dan ang Cattleya kaya sa kanyang nursery sa Baguio, may alaga siyang mahigit na 2,000 na karamihan ay mga mamahaling barayti. Pero marami rin siyang ibang barayti ng orkid kagaya ng Strap Leaf Vanda, Oncidium, Dendrobium at marami pang crosses.
Si Dan ay maituturing na “hands-on” na hardinero. Siya mismo ay nagtatrabaho sa kanyang nursery. Sa katunayan, iisa ang kanyang katulong na nag-aalaga ng libu-libong orkid at
ornamental plant sa Baguio. Ganoon din sa kanyang nursery sa Pangasinan. Iisa rin ang kanyang trabahador. Saka lang siya kumukuha ng ekstra na katulong kung may maraming gagawin.
At siyempre, pinipili niyang alagaan ang mga barayting naiiba at may mataas na halaga. Dahil dito, marami ang mahihilig sa mamahaling halaman na bumibili sa kanya. At malaki rin ang kinikita niya sa kanyang paghahalaman. Kaya lalong mas masaya siya kaysa noong nagsisilbi bilang isang doktor sa Amerika at sumusuweldo ng dolyar.
Hala, kung saan kayo maligayang kumikita ng salapi, gayahin si Dr. Daniel Farnacio.