May Mensahe Bang Hatid Ang Panaginip?
MARAHIL karaniwan na sa tao ang managinip kung siya’y tulog na, iyong tinatawag na theta, o light sleep o mababaw na tulog. Mangyari’y pag siya’y nasa delta, deep sleep o malalim na tulog na, di na siya siya puwedeng managinip pagkat idinuduyan na siya ng kawalang-malay, ng pamamahinga ng kanyang mind consciousness.
Pag nananaginip ang isang tao, parang nanonood lang siya ng pelikula habang natutulog, nakikita niya ang kanyang sarili, o ng ibang tao/mga tao sa isang lugar, sa isang pangyayari, na kung minsa’y tila iba o taliwas sa takbo ng kanyang buhay pag siya’y nagkakamalay sa totoong buhay.
Ang panaginip, ayon sa mga psychiatrists at hypnotists, ay dumarating sa black and white at technicolor, batay sa uri ng pagkatao ng kinauukulan. May masaya, may malungkot at may nakakatakot na tagpo o eksena sa panaginip na kung minsa’y gigising agad sa atin, at di maaaring sansalain.
Bukod sa ito’y pumapaksa sa isang bahagi ng ating buhay na dapat pag-ukulan ng pansin, ito’y nagpapahiwatig din ng mga mahahalagang bagay na nakaligtaan sa nakaraang panahon, o nakakaligtaan sa kasalukuyan. O kaya’y ito’y nagbabadya ng darating na pangyayari sa hinaharap.
Ayon kay Denise Lynn, na sumulat sa mga librong “The Secret Language of Signs” at ng “Sacred Space,” ang panaginip ay dumarating sa pagitan ng pisikal na mundo ng katotohanan at ng mundo ng ilusyon.
Ang mga siyentipiko sa kasalukuyan ay nagsasabing ang mga panaginip ay neurons lamang mula sa pandama ng tao na nananalaytay sa mga kalamnan o ugat mula sa spinal cord hanggang sa utak, inilalabas at itinatapon ang mga impormasyong nakaimbak sa isipan na di na kailangan ng kinauukulan. Ang mga psychologists naman ay naniniwala na ang mga panaginip ay isang paraan upang mapanatili ng mga kinauukulan ang kanilang emotional balance at pakawalan ang mga supil na paghihirap na nararanasan nila kung sila’y gising. Ang mga nananaginip noong unang panahon ay naniniwalang nagtataglay ang bawat panaginip ng mga mensahe at simbolo na kung maiintindihan at gagamitin ay nagdudulot sa kanila ng pagbabago o pagbabanyuhay, sa kanilang personal na buhay at ng pangkalahatang pagbabago ng kanilang bansa.
Sa Bibliya, lalo na sa Lumang Tipan, mababasa natin ang ilang karakter na nauugnay sa panaginip na bumago sa takbo ng kanilang buhay. Una rito’y ang karanasan ni Jose, isa sa 12 anak na lalaki ni Jacob o Israel, na tinaguriang “dreamer”, isang taong mahilig managinip sa gabi, ng kanyang mga kapatid. (Gen.37: 5-8) Dalawa ang kanyang napanaginipan. Ang una’y ang tungkol sa mga binigkis na trigo sa bukid. Ang kanyang mga binigkis ay niyukuran ng mga binigkis ng kanyang mga kapatid. Bagay na ikinagalit ng mga ito dahil kung ipakahulugan iyon ay siya, si Jose, ang yuyukuran nila, tulad sa isang hari, pagdating ng araw. Ang ikalawang panaginip ni Jose ay ang tungkol sa araw, buwan at ng mga bituin na pawang nangayuko sa kanyang harapan na ikinagalit uli ng kanyang mga kapatid, pagkat, gaya ng nauna, ito’y nagpapahiwatig na silang magkakapatid, kabilang ang kanilang mga magulang, ay yuyuko sa kanya. (Gen. 37: 9-10)
Ngunit kung babasahin natin at susundan ang kasaysayan ni Jose hanggang sa huling bahagi ng Genesis, di ba nagkatotoo ang lahat ng kanyang napanaginipan?
Sa aklat na 1 Hari, matutunghayan natin na nang umupong hari sa Juda o Israel si Solomon na anak ni Batseba kay Haring David, sa pamamagitan ng isang panaginip nakipag-usap sa kanya si Yahweh. Sinabi sa kanya ng Diyos na bukod sa hinihingi nito sa Kanya na karunungan upang mapamunuan niyang mabuti ang kanyang mga nasasakupan, ipinagkaloob pa sa kanya ni Yahweh ang kayamanan, kapangyarihan at mahabang buhay dahil sumunod siya sa kagustuhan ng Diyos at napasaya niya ito. (1 Hari 3: 5-15).
Sa aklat naman ni Propeta Daniel, sinasabing mahilig ding managinip si Haring Nebucadnezar. Ang siste, nakakalimutan niya ang kanyang mga napanaginipan pag nagigising na siya. At higit sa lahat, di niya naiintindihan ang mga ito. Isiinangguni niya ang mga propeta, mago at paham sa black at white magic ngunit wala sa kanila ang nakapagsabi sa panaginip at ng kahulugan nito. Sa tulong ng Diyos, nagawang ipaalala ni Daniel ang napanaginipan ni Haring Nebucadnezar at ng kahulugan ng malaking rebulto at punongkahoy na nakita niya sa gitna ng kahariang umaabot pa ang mga sanga’t dahon nito sa kalangitan. (Daniel 2-4) Muli, ipinaliwanag ni Daniel ang kahulugan ng mga panaginip ng hari at siya’y pinagkalooban ng mga gantimpala!
Sakto ang pagpapakahulugan ni Daniel sa mga panaginip ni Haring Nebucadnezar at nagkatotoo ang mga ito. Sa huling panaginip ng hari, nagkatotoong sa likod ng kanyang malawak na kapangyarihan, bumagsak ang kanyang kaharian at siya’y nabaliw. Ngunit nanumbalik ang kanyang wastong pag-iisip at nabawi rin niya ang kanyang kaharian pagkaraan ng pitong taong namuhay siyang parang hayop sa kaparangan at kung saan taos-puso siyang nagsisi sa kanyang mga kasalana’t kasamaan. Si Daniel man ay isa ring ‘dreamer’ at nananaginip ng mga tanda’t simbolo ng mga pangyayaring sumasakop sa hinaharap at ng kawalang hanggan!
May mga tao pa rin sa ngayon, sa buong daigdig, ang naniniwala sa mga mensahe at simbolo ng mga panaginip na may kaugnayan sa kanilang buhay. Si Marlon, isang opisyal ng PTA sa isang paaralan ng kanilang bayan, ay nagkaroon ng mahiwagang panaginip. Diumano, siya raw ay nasa gitna ng bukid kung saan nakita niya ang isang napakalaking puso na pumipintig-pintig pa mandin. Habang isang lobo at kumikilos o lumilipad paitaas. Ang ipinagtataka ni Marlon, bigla na lamang itong sumabog at pumailanglang ang daan-daang piraso ng lobo na bigla niyang ikinagising! Sa tantiya niya sa sarili, wala siyang sakit o ano mang nararamdaman. Ngunit minabuti niyang sumangguni sa isang doktor na kilala niya. Sinabi ng doktor na tumataas ang kanyang blood pressure at kung hindi maagapan, makakaapekto sa kanyang kalusugan ng kanyang puso. Nagbigay ito ng reseta ng mga gamot na dapat niyang inumin. Gumaling siya!
Sabihin man ng iba na walang kaugnayan ang panaginip sa personal na kalagayan at kabuhayan ng isang tao, marami at higit na marami ang naniniwalang ito’y instrumento na ipinagkaloob sa atin ng Dakilang Diyos upang salaminin ang hiwaga at katotohanan na nakikita at nararanasan natin sa daigdig ng panaginip.