Paghandaan Ang Pag-aasawa, Hindi Lamang Ang Kasal
KAY raming kabataang pinipiling hindi na lamang mag-asawa kahit nasa edad na (o lampas na sa tamang edad). Marahil, dahil marami silang nakikita o nababalitaang mag-asawang nag-away lamang at naghihiwalay. At para naman sa mga ibig “lumagay sa tahimik,” wala rin sa loob nila ang tamang mga values hinggil sa pag-aasawa. Ayon sa librong Understanding Your Spouse Before and After Saying “I do” ni Henrietta Okechukwa, isang counselor sa Abuja sa Nigeria, maraming kabataang nagpapakasal para lamang makapangasawa ng isang mayaman. Ang hinahanap nila ay isang buhay ng kaginhawahan at luho, nang hindi isinaalang-alang ang mga bagay na dapat nilang taglay para maging masaya at banal ang buhay nila bilang may-asawa. “Isinasangla nila ang kanilang buhay at ipinagpapalit ang kanilang kaligayahan sa mga panandaliang kasiyahan o aliw sa buhay,” ani Okechukwa.
Noong 2014, humarap si Pope Francis sa 10,000 kabataang magpapakasal at maghahanda para sa pag-aasawa sa isang selebrasyon ng Valentine’s Day sa St. Peter’s Square sa Rome, Italy. Tinalakay ng Santo Papa ang tungkol sa pag-ibig at katapatan bilang mga may-asawa. Hinikayat din ni Pope Francis na huwag silang matakot na magkaroon ng panghabambuhay na pangako na hinihingi ng buhay mag-asawa.
Nagpahayag ng kalungkutan ang Papa sa mga panandaliang pagsasama ng mga may-asawa sa ngayon. Kaya, gayon na lamang ang pananaw ng maraming kabataan na ang pag-aasawa’y pansamantala lamang – ang makasariling kagustuhan ang ibig nilang masunod.
Ayon kay Bishop Anselm Umoren, auxiliary bishop ng Abuja, ang pananaw na ito ang dahilan kung bakit napakaraming oras at pera ang iginugugol sa paghahanda para sa isang kasal, sa halip na paghandaan ang buhay may-asawa.
Hindi ba’t napakaraming programa sa TV na nagsusulong sa kahalagahan ng mga wedding gowns para sa mga brides at kanyang bridal entourage? Hindi ba’t nagkalat sa mga bookstores at magazine stands ang mga glossy na babasahin tungkol sa mga wedding dresses na sumusunod sa uso o fashion? At hindi ba nauso na rin na umupa ng isang wedding planner para ayusin ang mga detalye sa simbahan at sa reception? Nakatuon ang lahat ng pansin sa ayos ng kasal at paano pasisiyahin ang mga bisita! (Hindi naman ito masama pero kung lahat ng gastos at atensiyon ay inilalaan lamang sa pagpapakasal, paano na ang buhay ng mga bagong kasal pagkatapos ng reception?)
Ilang oras lamang idaraos ang seremonya ng kasal, ngunit ang panahon pagkatapos ng kasal ay panghabambuhay!
Pinayuhan ni Bishop Umoren ang mga engaged couples na pagnilayan nilang maigi ang kanilang mga values at mga pinaniniwalaan at pati na ang values ng kanilang mapapangasawa. Hinikayat niya sila na hindi ituloy ang kanilang pagiisang dibdib kung hindi sila nagkakasundo sa iisang pangako o commitment para magtagal at maging masaya ang kanilang pagsasama. Kasama rito ang commitment nila sa kanilang pananampalataya, at sa mensahe ng ebanghelyo.
Ang kanyang makabuluhang payo: “mas mabuting putulin na lamang ngayon ang isang relasyong walang intensiyong maging tapat sa kanilang commitment, kaysa ipagpatuloy ang isang miserableng buhay bilang mag-asawa.”