Ano Ang Dapat Pagnilayan Sa Semana Santa?
MATAPOS iwagayway ang mga palaspas sa Linggo ng Palaspas sa mga simbahan upang gunitain ang matagumpay na pagpasok ni Jesus sa Jerusalem, inaanyayahan ang lahat ng mga Kristiyano na pagnilayan ang itinuturo ng kanilang pananampalataya. Ano ang maaaring pagmuni-munian ng kapwa mga Katoliko at Kristiyano ngayong Semana Santa?
Nakatuon ang ebanghelyo ng Lunes Santo sa papel ng mga kababaehang inilaan ang buhay sa paglilingkod kay Kristo na siyang inilalarawan sa isang pagtatagpo ni Maria (kapatid ni Lazaro at Marta) at ni Jesus. Sa tagpong ito, pinahiran ni Maria ng mamahaling pabango ang mga paa ni Jesus at tinuyo niya ito sa pamamagitan ng kanyang buhok. Ayon sa salvation history, isang babae – si Eba – ang ipinagkasala ng sangkatauhan. Ngunit isa ring babae – si Maria, ang ina ni Jesus – ang siyang ginawang instrumento ng Diyos upang mailigtas ang tao, ayon sa yumaong Arsobispo na si Fulton J. Sheen.
Ginugunita naman ng ebanghelyo sa Martes Santo ang mga pinagsasabi ni Pedro na nagkanulo kay Kristo nang tatlong beses – si Pedro na pinili ni Jesus na pamunuan ang Simbahang kanyang itinatag! Ipinakikita sa ebanghelyo ang kayabangan ni Pedro (ngunit isang kayabangang kanyang pinagsisihan at kanyang ipinagbago).
Ang paksa naman ng ebanghelyo sa Miyerkules Santo ay ang pagkakanulo ni Judas Iscariote kay Jesus (Mateo 25:1425). Makikita ang lahat ng uri ng pagkakanulo sa maraming lugar – sa mga tahanan na may kalaguyo ang mag-asawa, sa mga organisasyon na tinatago ng mga corporate leaders ang mahahalagang impormasyon tungkol sa pananalapi o pondo (o kawalan nito) ng opisina hanggang sa kailangan na nilang ilaglag o abandonahin ang kanilang mga empleyado.
Tampok naman sa misa o rituwal ng Huwebes Santo ay ang tinatawag na Mass of the Lord’s Supper, ang paghuhugas ng mga paa ng 12 disipulo, isang prusisyon matapos ang Eukaristiya, at isang vigil sa loob o labas ng simbahan na ilalagak ang Blessed Sacrament. Ang tema ng ebanghelyo at rituwal na ito’y tungkol sa pag-ibig sa kapwa at kababaang-loob (Juan 13:1-15).
Ang pagmamahal at pagmamasalakit sa kapwa (brotherly love) na siyang sandata laban sa inggit ang isa sa mga pangunahing dahilan ng maraming problema at kalungkutan sa mundo. Tingnan na lamang natin ang pagkainggit ng mga miyembro ng pamilya sa magandang kapalaran ng iba nilang kamag-anak, ang kanilang pag-unlad sa buhay o trabaho, o kahit ang kanilang pagbabalik-loob, na siyang inilalarawan
ng kuwento tungkol sa alibughang anak. Kinainggitan siya ng kanyang nakatatandang kapatid na ibig magbagong-buhay.
Ang mga pagninilay naman sa Biyernes Santo ay sukat ipaalaala sa mga nananalig kay Kristo ang tungkol sa walang hanggan Niyang pag-ibig sa sangkatauhan – na handa Siyang iwan ng Kanyang mga kaibigan at magdusa at magbuwis ng buhay sa pamamagitan ng pagpapakasakit Niya sa krus.
Tinatanong ng antipona sa Biyernes Santo: paano natin masusuklian ang kanyang pag-ibig? Ang ibig sabihin nito’y paano natin ipakikita na ang ating pagiging Kristiyano’y tunay at panghabambuhay?
Ang mga paraang tinuro ni Kristo ay hindi madali – patawarin at mahalin ang ating mga kaaway, tiisin ang pagkukulang ng mga miyembro ng ating pamilya, ang hangarin ang kabutihan ng mga nagkasala sa lipunan. Ngunit dapat isaisip ng bawat Kristiyano na hindi mga suhestiyon o panukala lamang ang Sampung Utos!
Ang punto ng ating mga pagninilay sa Semana Santo ay ang katotohanang ang Kristiyanismo ay hindi lamang kalipunan ng mga rituwal at tradisyon. Ayon kay St. Josemaria Escriva, ang nagtatag ng Opus Dei, ito’y misyon ng bawat Katoliko at Kristiyano na isabuhay ang ating mga pinaniniwalaan at tinuturo. Ayon sa kanya, ang pagiging Kristiyano’y hindi lamang daan tungo sa personal na kasiyahan kundi rin isang pangako o commitment na dapat mag-ugat sa buhay natin dito sa mundo.