Epektibong Pagtuturo
22
KUNG babalikan ang kasaysayan, malinaw pa sa ating alaala ang pananakop at paghahari-harian ng mga Amerikano sa ating bansa. Ang naitanim sa ating isipan na hanggang ngayon ay nagsisilbing saligan ng ating kinabukasan ay ang napakalaking handog nila sa pagdukal ng ating karunungan…ang edukasyon.
Ipinagkaloob sa atin ng mga Amerikano ang edukasyon nang walang pagtatangi- mayaman man o mahirap, matalino man o mangmang, nasa kabayanan man o kalunsuran, ang edukasyon ay naging bukas para sa lahat.
Itinayo ang mga pampublikong paaralan na nagbigay ng libreng edukasyon para sa lahat ng mga Pilipinong nais matutong bumasa at sumulat gamit ang mga sinaunang kagamitang panturo. Natutuhan nating magsalita at makipag-ugnayan sa ating kapuwa gamit ang Ingles. Naisakilos natin nang wasto ang mga tamang senyas at kumpas ng ating mga kamay, gayundin naman ang galaw ng ating katawan sa pakikipag-usap at pagpapahayag ng ating mga saloobin at nadarama.
Sa kabila nito, paglipas ng maraming taon, may iba’t ibang pananaw ang ating mga kababayan sa naging malaking kontribusyon ng mga Amerikano sa pagpapayaman ng ating kaisipan. Ang sabi nga sa isinulat na artikulo ni Dr. Ponciano B.P. Pineda, ang unang Komisyoner ng Komisyon sa Wikang Filipino,
“Ayon sa kasaysayang sinulat ng mga dayuhan at ng mga Pilipinong gumagamit ng salaming dayuhan- pumarito ang mga Amerikano upang hanguin tayo sa barbarismo. Bibigyan daw nila tayo ng edukasyon. Binigyan nga, edukasyong popular pagkat sa simulain ay bukas sa lahat ng mga mamamayan. Ang wikang panturo ay Kano. Ang mga asignatura ay hulwaran sa Kano. Malayo na ang panahong iyon sa pagdaong ni Dewey sa aring dalampasigan, ngunit narito pa rin ang mga bakas. Isa tayong kolonya hanggang ngayon, ang sistema natin ay tunay na kolonyal.”
Ngunit malinaw ang tatlong pangunahing layunin ng mga Amerikano sa pagpapalaganap ng edukasyon: Una, palaganapin ang demokrasya. Ikalawa, ituro ang wikang Ingles. Ikatlo, ipaabot sa mga Pilipino ang kultura ng mga Amerikano.
Ngunit ganito ang interpretasyon ni Dr. Pineda sa tatlong layuning nabanggit nang ipahayag niya ang ganito: “Habang nabibidbid ang ating paturuang pambansa ng sistemang Amerikano, at habang tinatagikawan tayo ng wikang Amerikano, mananatili tayong second rater lamang sa edukasyon, manggagaya, at batayang walang bait sa sarili. Ang wikang Filipino’y handa upang gamitin sa de-Amerikanisasyon ng isang Amerikanisadong mamamayang Pilipino. “
Pagkalipas ng maraming taon, marami na ring nabago sa sistema ng ating edukasyon: nabago ang kurikulum ng makailang ulit, kasabay na ipinalaganap ang teknolohiya sa mga paaralang publiko at pribado mula sa antas elementarya, sekondarya at tersyarya.
Bago magtapos ang 2019, isa na namang pagbabago ang inilunsad ng Kagawaran ng Edukasyon na tinawag nilang DIGITAL THUMBPRINT PROGRAM (DTP).
Inilunsad ng Kagawaran ng Edukasyon ang Digital Thumbprint Program (DTP) na pormal na pagsasanibin ang integrated digital citizenship and responsibility sa kurikulum ng batayang edukasyon.
SAng layunin ng DTP INABI ni Kalihim Leonor Briones ng Kagawaran ng Edukasyon na ginawa ang Digital Thumbprint Program ng telecommunications company Globe bilang tugon sa layuning maituro sa mga mag-aaral ang tamang beheybyor sa on line at makalikha ng bukas, inklusibo at ligtas na on line environment.
“We are in a connected world where anyone can easily have access to the internet,” ang pahayag ni Kalihim Briones.
Naniniwala si Kalihim Briones na lubhang kailangan ang internet sa pagtatamo ng inklusibo at pantay na makalidad na edukasyon, ngunit ito ay nakakapaghahatid din ng takot at pangamba sa kabataan dahil ito’y maaaring makapinsala sa kanila.
Nilikha ng Globe upang mabigyan ng kaalaman sa digital citizenship at cyber safety ang mga guro at mag-aaral ang Digital Thumbprint Program ay nagbibigay ng modernong pananaw kung paanong gumagana ang online world, kung paano magiging responsableng online at kung paano magagamit ang internet sa positibong paraan.
MAng mga bahagi ng DTP AY apat na bahagi ang Digital Thumbprint Program: 1. Digital Insight. Ito’y naglalaman ng mga gawain na makatutulong sa mga mag-aaral na makatugon sa wastong on line behavior upang higit na mapangalagaan ang kanilang itinatagong impormasyon.
Ang ilan sa mga impormasyong nabanggit ay maaaring nauukol sa nilalaman ng mga natutuhang aralin ng mga magaaral, may pedagodyikal na kaalaman, may repleksiyon ng makahulugan at makabuluhang koneksiyon, may kagyat na paglutas sa internal na suliranin, at may oportunidad na makagawa ng mabilisang aksiyon sa isang epektibong gawain.
2. Digital Impact. Ito’y tumatalakay sa mga isyung panteknolohiya na may malaking Impact sa mga panlipunang gawain ng mga mag-aaral.
Upang higit na mabigyang empasis ang bahaging ito, mahalaga sa mga mag-aaral na magkaroon ng malalim na pag-unawa sa kaniyang pansariling kalagayang pisikal, kognitibo, sosyal at emosyonal habang nakapokus ang kaniyang pakikibahagi sa kaalaman sa isyung panteknolohiya.
Pagkaraang magkaroon ng kabatiran ang mga mag-aaral sa wastong paggamit ng teknolohiya, dapat na niyang matukoy ang iba’t ibang makabuluhang websites, kabilang ang pag-alam niya sa iba’t ibang uri ito. Higit na magiging makabuluhan ang
kanilang pagkatuto sa makabagong gamit – panteknolohiya kung makalilikha siya ng sarili niyang personal web page o school web page.
3. Digital Ambition. Ito’y nagkakaloob sa mga mag-aaral ng mga kasanayan sa paggamit ng teknolohiya upang matamo ang kanilang nilalayon sa buhay.
Hindi maipagkakaila na nasa panahon na tayo ng mabilis na pagsulong ng teknolohiya. Katunayan, maraming mamamayang Pilipino ang nakababatid na laging may pagbabagong nagaganap sa internet, at habang nag-a-access ang tao sa internet ay patuloy naman ang nagaganap na pagbabago. Sa darating na panahon, makakakita tayo ng maraming pagbabago sa teknolohiya, maging ang mga kagamitang panteknolohiya na maglalaan sa atin ng panahon na magamit ang internet sa paraang makabago at nakaaaliw.
Sa pamamagitan ng teknolohiyang pang-computer, naibabahagi ng mga magaaral sa kapuwa mag-aaral ang kanilang natutuhan. Sa puntong ito, dapat malinaw sa isipan ng mga mag-aaral ang ilang mga terminolohiyang ginagamit sa makabagong gamit panteknolohiya gaya ng browse, blog, twitter, blog posts, webpages, scanner, world wide web, at iba pa.
Dapat ding pakatandaan ng mga magaaral na maraming uri ng website na may espesyalisasyon sa partikular na uri o nilalaman o maging ng gamit nito gaya ng mga sumusunod: (1) celebrity website, (2) community website, (3) forum website, (4) gaming website, (5) media sharing website, (6) government website, (7) political website, (8) school website, (9) religious website, (10) ware website, (11) microblog website, (12) news website, (13) social networking website, at (14) personal website.
4. Digital Discernment. Ito’y nagtuturo sa mga mag-aaral kung paano makikita ang mga maling information online.
Madalas na makarinig o makabasa tayo ng katawagang fake news. Maiiwasan ito kung ipopokus lamang ng mga mag-aaral ang kanilang atensiyon sa mga tamang balita o wastong impormasyon na kanilang nababasa sa internet. Nagkakaroon ng kalituhan sa pagbabalita kung nagkakaiba ang mga bilang ng mga nababasa sa pahayagan o maging sa internet gaya ng ibaibang bilang sa resulta ng eleksiyon o bilang nga mga nasawi sa gumuhong gusali.
At bilang pagtanggap, sa isang maikling pahayag, ipinabot ni Yoly Crisanto, chief sustainability officer at senior vice president for corporate communications of Globe ang ganito:
“Isang napakalaking karangalan para sa amin na ang Digital Thumbprint Program ay maging integral na bahagi ng nilalaman ng K-12 Kurikulum ng Kagawaran ng Edukasyon. Dahil naitatag ang DTP tatlong taon na ang nakararaan sa isang libreng palihan, naging misyon na naming maipahatid ito sa mga guro, mag-aaral at magulang.”