Sa Gitna Ng Krisis, Paano Babangon?
INILUGSO ang kalusugan ng mga tao. Pinilay ang mga negosyo. Ibinalda ang work force. Marami ang naantala ang pinagkakakitaan. Habang marami rin ang tuluyang nawalan ng trabaho. Ibinagsak ang ekonomiya. Nilugmok ang Pilipinas. Dahil dito ay nagkandarapa tuloy tayo at halos isubsob sa kapighatian – hindi alam kung kailan o paano pa makakaahon. Matinding dagok ang idinulot ng pandemya ng COVID-19 sa bansa. Sino nga ba ang mag-aakala noong una na darating at lalatiguhin tayo nito?
Nakapanlulumo na hindi pa rin natatapos ang krisis na ito. Laging nakaantabay ang panganib. Kaya patuloy na binabalot ng pangamba at agam-agam ang bawat isa. Sa gitna ng kinakaharap nating bangungot, paano nga ba tayo babangon?
Gaano man tayo naapektuhan ng pandemya, hindi tayo dapat manatili sa pagkakadapa. Nararapat tayong mangunyapit sa mga hibla ng pag-asa upang makabangon, makapagsimulang muli at makapagpatuloy.
Kumatok. Maraming mga pinto ng oportunidad ang nagsara. Pero sabi nga, kapag isinara ang pinto, may bintanang bubuksan. Hindi naman dahil nawalan ka ng trabaho ay magwawakas na ang mundo mo. Maghanap ng panibago. Baka ikaw lang ang hinihintay nila. Kung kinapos ka naman at kailangan mo ng tulong—maging pinansiyal man o pangkalooban—lumapit sa iba. Kung hindi man kamag-anak, siguradong may ibang taong makakatulong sa iyo. Wala namang mawawala kung magbabakasakali. Kung kailangan ng pondo sa negosyo, ang gobyerno naman ay naglalaan ng puhunan.
Maging positibo. Laging isiping may magandang mangyayari. Na malalagay ka rin sa maayos na sitwasyon. Na magbubunga rin ang pagtitiis at pagsisikap mo. Kung lagi mo na lang iisipin na hindi ka magtatagumpay, hihilahin ka pababa ng paniniwala mo.
Maging matatag. Isipin na makakaya mo ang lahat. Tanggapin na ang lahat ng mga nangyayari ay may dahilan. At may naghihintay na magandang kahahantungan. Huwag pagigiba. Ituring ang sarili na parang isang sundalong habang nasusugatan ay nag-iibayo ang tapang.
Huwag mawalan ng pag-asa. Ang pag-asa ang nagbibigay ng liwanag sa isang magandang bukas. Ito ang nag-uudyok sa atin upang isa-isantabi ang mga hilahil at magsikap na mapangibabawan ang lahat. Kung mawawalan tayo ng pagasa, parang sinabi na rin nating huwag na tayong mabuhay. Ngunit kung magkakaroon tayo ng pag-asa, makapaglalaan tayo ng pokus upang magtagumpay.
Magpatuloy o magsimulang muli. Anuman ang aktibidad
o trabahong naudlot, ipagpatuloy. Ipursige rin ang mga naudlot na pasyon. Kung hinagupit ng kahirapan o bumagsak ang negosyo, magpundar ng panibago. Laging tumingin sa magandang direksiyon.
Manalig at umasam. Manalangin. Umasam na magkakaroon din ng wakas ang pagtitiis natin. Isinasaad sa 1 Juan 5:14-15, “Mayroon tayong katiyakan sa pagharap sa Kanya. Ito ang kapanatagan na sa tuwing humihingi tayo ng anumang bagay na ayon sa Kanyang kalooban, dinirinig Niya ito. Yamang alam nating dinirinig Niya tayo sa anumang hingin natin, alam din nating natatamo natin ang mga kahilingan na hiningi sa Kanya.”
Magkaroon ng lakas ng loob. Ito ang makatutulong sa atin upang makaagapay sa buhay at madaig ang lahat ng mga suliranin. Isipin na kayang-kaya natin ang mga ito. Ayon sa 1 Corinto 10:13, “Tiniyak din ng Diyos sa atin na hindi Niya tayo bibigyan ng pagsubok na higit sa ating makakayanan. Sa halip, pagdating ng pagsubok, bibigyan niya kayo ng lakas upang mapagtagumpayan iyon” .
May magandang layon ang Diyos kaya dumadaan tayo sa mga pagsubok. Sinasabi sa Santiago 1:2-12, “Mga kapatid, magalak kayo kapag kayo’y dumaranas ng iba’t ibang uri ng pagsubok. Dapat ninyong malaman na napatatatag ang ating pananampalataya sa pamamagitan ng mga pagsubok. At dapat kayong magpakatatag hanggang wakas upang kayo’y maging ganap at walang pagkukulang.”
Ipinapahayag naman ni Apostol Pedro sa 1 Pedro 1:6-7: “Ito’y dapat ninyong ikagalak, bagama’t maaaring magdanas muna kayo ng iba’t ibang pagsubok sa loob ng maikling panahon. Ang ginto, na nasisira, ay pinararaan sa apoy upang malaman kung talagang dalisay. Gayon din naman, ang inyong pananampalataya, na higit kaysa ginto, ay pinararaan sa pagsubok upang malaman kung talagang tapat.