Epektibong Pagtuturo
UMAPELA ako kay Pangulong Rodrigo Duterte na maipagpatuloy ng DepEd ang pagkakaroon ng bagong taong panuruan batay sa aming isinagawang road map. No face to face classes upang maipagpatuloy ang edukasyon ng mga mag-aaral. Kasi nakabuwelo na kami. Kung bigla-bigla itong tatanggihan, madadapa kami. Nakipag-ugnayan na kami sa dalawang malaking telecommunication companies. Kung walang internet access sa radyo, telebisyon at internet ang mga mag-aaral, maisasagawa ang manual learning. Magbibigay kami ng learning manuals. Hindi kailangang mga mag-aaral ang kukuha ng mgaito. Makikipagtulungan kami sa LGUs, kasi sa kiosk ng mga barangay ipapadala ang learning modules at ipapi-pick-up sa mga magulang. Mga guro naman ang pi-pick-up ng mga ito matapos masagutan ang itinakdang gawain ng mga mag-aaral. Nagsimula nang mag-enrol sa distance education ang 10,654,795 na mag-aaral simula noong unang araw ng Hunyo,” ang ipinahayag ni Kalihim Leonor M. Briones ng Kagawaran ng Edukasyon.
KAno ang Distance Education?
UNG babalikan ang kasaysayan, magugunitang nagsimula ang distance education sa University of London, ang kauna-unahang pamantasan na may awtorisadong magkaloob ng degree sa kursong natapos ng isang mag-aaral kahit hindi siya pumapasok sa unibersidad. Tinawag itong People’s University ni Charles Dickens. Taong 1858 nang maaprubahan ito ni Queen Victoria.
Si Sir Isaac Pitman ang unang nagturo ng aralin gamit ang distance education. Nagpapadala siya ng short-hand information sa mga mag-aaral. Pinasasagutan ang mga ito sa mga mag-aaral. Ipinadadala naman sa kaniya ng mga mag-aaral ang kanilang mga sagot.
Ang Distance Education ay kakaiba sa online learning. Ito ay edukasyon ng mga mag-aaral na hindi kailangang pisikal na magtungo sa paaralan upang makakuha ng kaalaman. Sa tradisyonal na pamamaraan, taglay nito ang tinatawag na mga kursong pangkorespondensiya (correspondence courses). Kabilang sa distance education o distance learning ang online learning.
Ang programang distance education ay kombinasyon ng distance learning o tradisyonal na pagtuturo sa loob ng silid-aralan o klasrum. Sa programang ito, ipinadadala ng guro sa kaniyang mga mag-aaral ang materyales ng pagkatuto at matatanggap ang mga ito ng mga mag-aaral online. Inaasahan ng mga guro na matutugunan ng mga mag-aaral ang ibinigay na mga gawain sa pagkatuto (learning tasks) batay sa itinakdang iskedyul ng pagsusumite.
Maraming katawagang maipakahuhulugan sa distance learning.
Ito’y tinatawag ding distributed learning, e-learning, m-learning, virtual classes, at iba pa.
Samantala, ang online learning naman ay gumagamit ng internet bilang instrumento sa pagkatuto. May distansiyang pisikal sa pagitan ng guro at mga mag-aaral ngunit nagaganap ang birtuwal na lektyur (virtual lecture) at iba pang pagtatayang online (online assessment). Itinatakda rito ang iskedyul ng tiyak na oras kung kailan naka-online ang mga mag-aaral upang makadalo sa birtuwal na lektyur ng guro. Sa set-up na ito, magaganap ang pagtalakay sa aralin dahil may pagtuturong magaganap na pakikinggan at panonoorin ng mga mag-aaral ang ipinahahatid na kaalaman ng kanilang guro. Maipagpapatuloy ang diskursong pang-akademiko at maaaring maganap ang interaksiyon ng guro sa mag-aaral o ng mag-aaral sa kamag-aaral.
Ang Bentahe ng Distance Education
1. Kaangkupan (Flexibility). Makapag-aaral ang mag-aaral kahit saang lugar siya tumungo bagama’t dapat masunod ang oras ng pagsusumite sa guro ng mga sagot sa itinakdang gawain at pagsusulit.
2. Katipiran (Save time). Maaaring pagkatapos maisumite sa guro ang mga itinakdang gawain o pagsusulit ay may iba pang magagawa ang mag-aaral gaya ng pagtulong sa mga gawaing-bahay, paglalaro, paglilibang at pamamasyal. Hindi tulad sa panahong siya’y buong maghapon na nasa paaralan.
Filipino Channel sa Distance Education
NOONG Setyembre 16, 2020 ay ibinalita ni DepEd Director Abram Abanil na magkakaroon ng 130 TV lecture episodes ang Kagawaran ng Edukasyon kaugnay ng isinasagawang Distance Education sa mga paaralan. Ang lecture episodes na magsisimula sa Oktubre 5 ay tatagal ng 20 minuto nang may pagtigil (break) mula ika-7:00 ng umaga hanggang ika-7:00 ng gabi. Nakapaloob dito ang major subject areas batay sa Most Essential
Learning Competencies ng K-12 Kurikulum. Simula sa Enero 2021 ay isasama ang mga katutubong wika na gamit sa Baitang 3 sa pagtuturo ng unang katutubong wika o Mother Tongue.
“May isasamang 19 na katutubong wika sa lecture episodes pati na ang senyas na wikang gamit sa pakikipagtalastasan. Ang magiging katuwang na channels sa programang ito ay ang IBC 13, PTV 4, Solar TV, Planet Cable, ang Philippine Telecommunications Cable at Cignal TV,” ang pahayag ni Dr. Abanil.