GREEN PARK: TUGON NG BROOKE’S POINT UPANG MAPANGALAGAAN ANG KALIKASAN
Isa sa hakbang ng Pamahalaang Bayan ng Brooke’s Point upang mapangalagaan ang kalikasan ay ang pagtatatag o pagtatayo ng Green Park, isa rin itong hakbang ng lokal na pamahalaang nabanggit bilang pagtalima sa Republic Act No. 9003 o ang “Ecological Solid Waste Management Act of 2000”.
Ang Green Park na matatagpuan sa Barangay Tubtub ay naitatag o naitayo noong Agosto 2015. May lawak itong dalawang ektarya. Dati itong dumpsite o tapunan ng lahat ng basura mula sa mga barangay na nasa poblacion ng nasabing bayan.
Subalit nang mabuo na ang 10 year Municipal Ecological Solid Waste Management Plan (MESWMP) 20162026 at nagkaroon na nang permanenteng sanitary landfill ang bayan ng Brooke’s Point ay naging mas kapaki-pakinabang ang nasabing parke.
Sa parke, itinayo ng pamahalaang lokal ang kanilang Material Recovery Facility (MRF) kung saan dito dinadala ang basurang maaari pang i-recycle tulad ng mga bote, plastic, karton at papel. Pakinabang ng basura:
Simula ngayong taon ay hindi na pinoproblema ng bayan ng Brooke’s Point ang kanilang mga basurang plastik, bote, karton at mga papel, dahil nito lamang mga nakaraang buwan ay dumating na ang ilang mga makinarya o equipment na makatutulong sa kanilang Green Park sa pagrecycle ng kanilang mga basura sa kapaki-pakinabang na bagay. Ang nasabing mga kagamitan ay ang Plastic Shredder, Glass Pulverizer, Mixer at Hollow Block Moulder.
Ang plastic shredder ay magagamit sa pagdurog ng mga plastic sa maliit na bahagi at ang glass pulverizer naman ang dudurog sa mga bote upang maging pino ito na maaaari nang ihalo sa buhangin at graba sa paggawa ng hollow blocks o kaya bricks.
Mayroon na ring cement mixer at hollow block moulder upang makompleto na ang produksiyon ng hollow blocks at bricks. Ang mga produktong ito ay planong ipagbili ng pamahalaang lokal sa mga residente na nangangailangan nito sa pagtatayo ng mga bahay sa murang halaga.
Ang mga basurang papel naman at karton ay ginagawang charcoal bricks sa pamamagitan ng pagbabad ng mga basurang papel at karton sa tubig at kapag malambot na ito ay ihuhulma ito sa kanilang hulmahan at patutuyuin ng ilang araw at kapag natuyo na ay maaari na itong gamitin kung saan mas mura ito kumpara sa paggamit ng uling mula sa kahoy o bao ng niyog at gas.
Samantala, para naman sa mga nabubulok na basura ay itinayo rin sa Green Park ang Vermi Composting Facility (VCF) at ang naaani ditong organikong abono ay ipinagbibili sa murang halaga sa mga mga nagtatanim ng gulay at halaman.
Koleksiyon ng basura: Ipinatutupad ng Solid Waste Management Office (SWMO) ng Brooke’s Point ang “No Segragation, No Collection” policy. Hinikayat din ng pamunuan ng SWMO ang lahat ng mga barangay na magtayo ng kani-kanilang MRF upang mas madali ang pangongolekta ng mga basura.
Nagsagawa rin ang mga kawani ng SWMO ng mga ‘information, education campaign’ sa mga residente ng bawat barangay ng nasabing bayan kasama na ang pagtuturo sa mga ito ng tamang paghihiwa-hiwalay ng mga basura.
Green Park MRFAng bayan ng ng Brooke’s Point ay mayroong 18 barangay kung saan bawat barangay ay may nakatalagang truck o sasakyan na maghahakot ng mga basura mula sa kanikanilang MRF. Bawat barangay ay may nakatakdang araw ng paghahakot ng basura.
Ginawaran ng pagkilala ang mga bayan ng Brooke’s Point sa 2017 Search for Best Local Government Unit (LGU) Solid Waste Management (SWM) Practices na itinaguyod ng pamahalaang panlalawigan sa pamamagitan ng Provincial Government-Environment and Natural Resources Office (PGENRO).
Napagwagian nito ang unang gantimpala sa kategorya ng 1st-3rd Class Municipalities sa buong lalawigan. Pinarangalan din ito bilang Best in Composting Facility, Best in Waste Segregation, Best in Solid Waste Management Practices, at Best in Community Participation.
Sa pagkakapanalo nito ay tumanggap ito ng plake at ng P450,000 bilang salaping gantimpala.