Kongreso suportado ang kilusang kooperatiba

Tinututukan ngayon sa mababang kapulungan ng kongreso ang pagpapalakas sa Cooperative Development Authority (CDA) bilang regulatory body sa pagpapaunlad ng kilusang kooperatiba sa bansa.

Sa mensahe ni Congressman Rico B. Geron, chairperson ng Committee on Cooperatives, sa mga dumalo sa 10th Provincial Cooperative Convention noong ika24 ng Oktubre, ay kanyang tinuran na maliban sa pagpapanukala ng mga batas na may kinalaman sa kilusang kooperatiba ay nakatakda ring amyendahan ng kongreso ang charter ng CDA upang palakasin pa ang mandato nito.

“Mas dapat nilang pagtuunan ang pag-regulate sa ating mga colleagues upang hindi na sila malihis ng landas, upang maalis natin ang mga hindi dapat marehistro bilang kooperatiba at mabantayan upang hindi mapagsamantalahan,” paliwanag ng kinatawan ng AGAP party list.

Dagdag pa ng kongresista na kinakailangan nang linisin ang hanay ng kooperatiba sa bansa dahil marami sa mga ito ang hindi na tumutugon sa tungkulin ng isang kooperatiba.

Mayroong humigit kumulang

27,000 rehistradong kooperatiba sa buong bansa.

May mga kooperatiba umanong nagpaparehistro lamang bilang isang kooperatiba upang makaiwas sa pagbabayad ng buwis.

“Balikan natin ang dahilan kung bakit ba tayo binibigyan ng exemption privilege sa buwis ng ating pamahalaan,” pagbibigay diin ni Cong. Geron. “Sapagkat tinitignan tayo ng pamahalaan bilang ka-partner sa pagpapaunlad ng kabuhayan ng ating maliliit na mga kababayan.”

Ang naturang mambabatas ay siya ring Chief Executive Officer ng Sorosoro Ibaba Development Cooperative (SIDC) na nagbukas ng kanilang feed mill sa Narra, Palawan noong ika-25 ng Oktubre na nakikitang malaking tulong sa mga nag-aalaga ng baboy at manok.

Sa pagbubukas umano nito ay nakatitiyak ang mga miyembro ng kooperatiba na nagtatanim ng mais na may mapagbebentahan sila ng kanilang mga produkto. Ang mais ang pangunahing sangkap sa paggawa ng mga pakain sa paghahayupan.