Youth Congress sa Narra, Palawan, pinangunahan ng Prov’l Health Office
Mahigit 160 mga kabataan mula sa bayan ng Narra ang dumalo sa isinagawang youth congress kamakailan sa pangunguna ng Provincial Health Office (PHO).
“Empowering Youth in Reproductive Health“, ito ang adbokasiyang itinataguyod sa kasalukuyan ng PHO para sa kabataang Palawenyo sa pamamagitan ng pagsasagawa ng mga youth congress sa bawat munisipyo sa lalawigan.
Layon nito na maitaas ang kamalayan ng bawat kabataan sa usapin ng Reproductive Health (RH) partikular na sa mga usapin tulad ng teenage pregnancy, sexuality education, iba’t-ibang sexually transmitted infections (STIs), Human Immunodeficiency Virus (HIV) at Acquired Immune Deficiency Syndrome (AIDS).
Ayon kay Elvie R. Lao, Program Manager ng Adolescent and Reproductive Health, target ng PHO na maturuan ang mga kabataan sa Junior at Senior High School at sa kolehiyo upang maging katuwang ng pamahalaan sa pagtataguyod at pagpapalaganap ng mga programang pangkalusugan at nang maiwasan ang iba’t-ibang sakit.
Katuwang ng PHO sa pagsasagawa ng youth congress ang Roots of Health o Ugat ng Kalusugan na isang nongovernment organization na nakabase sa lungsod ng Puerto Princesa at pangunahing nagtataguyod ng mga programa kaugnay ng reproductive health.
Sa pagtatapos ng youth congress ay bumuo ang mga kabataan ng Municipal Reproductive Health Club na tututok sa mga programa upang isulong ang kalusugan ng bawat kabataan sa naturang bayan.
Sa bayan naman ng Roxas isasagawa ang susunod na youth congress sa buwan ng Nobyembre.