Networking session sa pagitan ng grupo ng mga negosyante mula Kudat , Malaysia at Palawan, isinagawa
Nagsama-sama ang grupo ng mga negosyante mula sa Kudat, Sabah, Malaysia at lalawigan ng Palawan sa isang Business Networking Session na ginanap noong ika-6 ng Nobyembre, sa lungsod ng Puerto Princesa na pinangunahan ng Mindanao Development Authority (MinDA).
Katuwang ng MinDA ang Pamahalaang Panlalawigan ng Palawan sa isinagawang business networking session na nilahukan ng Kudat Chinese Chamber of Commerce (KCCC), Puerto Princesa City Chamber of Commerce and Industry, Inc. (PPCCI) at Palawan Economic Development Council (PEDCO).
Ayon sa MinDA, nakasalalay sa pribadong sektor ang pagsasakatuparan ng layunin ng Brunei, Indonesia, Malaysia, Philippines East ASEAN Growth Area (BIMP-EAGA) na magkaroon ng paglago sa ekonomiya sa mga pinagtutuunang lugar tulad ng Palawan at Kudat.
“It is in the hands of the private sector – the ones who we consider as the engine of growth in terms of increasing chain tourism and investments in our areas,” wika ni MinDA Development Management Officer Eamarie Gilayo.
Ang gawain ay bahagi ng napipintong pagbubukas ng rutang Palawan patungong Malaysia sa pamamagitan ng Buliluyan Port sa bayan ng Bataraza at Kudat Port na inaasahang magpapasigla sa industriya ng turismo at kalakalan sa dalawang probinsya.
“Our objective is to establish the business link for the business sector in both side with the soon to be launch RORO ferry service between Palawan and Kudat,” saad ni G. Bobbie Chen Kah Khing ng Sabah Minister for Trade and Industry. “It will further strengthen the trade connection of both side. Beside trading, tourism and … can easily grow.”
Bahagi ng gawain ang paglagda sa memorandum of understanding sa pagitan ng tatlong grupo para sa promosyon ng pamumuhunan sa lalawigan ng Palawan at Sabah, Malaysia. Pumirma rito sina KCCC Chairman Datuk Pak Chee Eng, PPCCI President Atty. Joel Tan at PEDCO President Engr. Benedicto Guaño Jr.
Ang paglagda ay sinaksihan ni Dr. Myrna Lacanilao ng Pamahalaang Panlalawigan ng Palawan at G. Bobbie Chen Kah Khing ng Sabah Minister for Trade and Industry. Dumalo rin sa gawain si Vice Governor Victorino Dennis Socrates.(P.R)