Buwan ng Civil Service na may temang “Lingkod Bayani: Maka-Diyos, Makatao, Makabayan” ipagdiriwang ng Pamahalaang Panlalawigan
Buwan ng Civil Service na may temang “Lingkod Bayani: Maka-Diyos, Makatao, Makabayan” Ipagdiriwang ng Pamahalaang Panlalawigan Bilang pakikiisa at pagkilala sa maayos na serbisyo ng mga kawani ng kapitolyo, ang Pamahalaang Panlalawigan sa ilalim ng liderato ni Gobernador Jose Chaves Alvarez ay magkakaroon ng dalawang linggong selebrasyon sa kapitolyo upang ipagdiwang ang ika 118th anibersaryo ng pagkakatatag ng Philippine Civil Service sa bansa. Ang selebrasyon ay sisimulan sa ika-14 ng Setyembre at magtatapos sa ika-28 ng Setyembre, taong kasalukuyan. Kaugnay nito, magkakaroon ng iba’t ibang aktibidades sa kapitolyo katulad ng patimpalak sa pagkanta at sayaw at kompetisyon sa indoor and outdoor isports. Bukas ito sa lahat ng kawani ng kapitolyo regular man o contractual. Ang mga empleyado ay hinati sa limang koponan na kinabibilangan ng Gray, White, Pink, Black at Orange Team. Sa pagbubukas ng selebrasyon ay magkakaroon ng isang Banal na Misa sa ganap na ala-una ng hapon (1 PM) na gaganapin sa Telesforo S. Paredes Pavilion at susundan ng isang parada. Ang inaabangang Hataw Dance Exercise Competition ay isasagawa pagkatapos ng maikling programa. Magkakaroon ng kompetisyon sa indoor games na kinabibilangan ng Table Tennis, Dart, Chess at Scrabble at ballgames tampok ang mga larong Volleyball at Basketball na magsisimula sa ika-17 ng Setyembre sa ganap na alas Dos ng hapon (2PM) at magtatapos sa ika-27 ng nasabing buwan. Sa ika-21 ng Setyembre ay magtatagisan ang bawat koponan sa pag-awit na may dalawang kategorya; ito ay ang kinagigiliwang Doble Kara Singing Competition at Quartet Singing Competition na magsisimula sa ganap na ala-una ng hapon (1PM) at susundan ito ng kompetisyon sa Folk Dance. Magkakaroon din ng Talakayan sa Kapitolyo na lalahukan ng mga kawani at ito ay gaganapin sa ika-19 ng Setyembre sa ganap na ika-walo ng umaga sa VJR Hall. At para sa pagtataguyod ng adbokasiya para sa healthy lifestyle ay magkakaroon ng Fitness Exercise araw-araw tuwing Alas Kuwatro (4 PM) hanggang alas Singko ( 5 PM) ng hapon simula sa ika-20 hanggang ika 27 ng Setyembre na gaganapin sa Telesforo Paredes Pavilion. Sa huling araw ng selebrasyon,sa ika-28 ng Setyembre ay magkakaroon ng kasiyahan na kung saan ay sama-samang magtitipon para sa isang salo-salo ang mga kawani, hepe at mga opisyales ng Pamahalaang Panlalawigan. Inaasahan na ang selebrasyong ito ay lalong magpapaigting at magpapatatag ng samahan ng mga kawani, hepe at opisyales ng pamahalaang panlalawigan na siyang magbibigay ng karagdagang sigla at inspirasyon sa pagganap ng kani-kanilang mga tungkulin.