Apat na parangal, nakuha ng Palawan sa 2018 Mimaropa Regional Nutrition Awards
Masaya ang mga kinatawan ng Palawan sa apat na pagkilala na nakuha ng lalawigan sa katatapos na 2018 Mimaropa Regional Nutrition Awards na ginanap sa lungsod ng Muntinlupa Ang pangkat ng Palawan ay pinangungunahan ni Provincial Nutrition Action Officer ( PNAO) Rachel Paladan. Ayon kay PNAO Paladan, sa kauna- unahang pagkakataon ay binigyan ng pagkilala ang Palawan bilang Most Dynamic Province on Nutrition Program Implementation sa buong rehiyon ng Mimaropa. Ani Paladan, dahil umano ito sa pagsusumikap ng Pamahalaang Panlalawigan ng Palawan na maipatupad ng maayos ang mga programang pang- nutrisyon sa buong lalawigan partikular na ang pagbibigay ng kaalaman at kapasidad sa mga health worker at mga punong barangay para matutukan ang mga programa sa kanilang mga komunidad. Muli namang nasungkit ng Bayan ng San Vicente ang 2017 Municipal Green Banner Awardee para sa buong lalawigan ng Palawan. Ang San Vicente ang may pinakamababang Malnutrition Prevalence Rate ( MPR) sa Palawan. Kapwa nagkamit naman ng ikatlong puwesto ang Barangay Panacan sa Bayan ng Narra bilang 2017 Regional Outstanding Barangay Nutrition Committee (ROBNC) at si Rosie B. Asuela bilang Outstanding Regional Barangay Nutrition Scholars ( BNS). Pahayag pa ni Paladan na dahil sa mga parangal na ito ay pagsisikapan pang lalo ng kanyang tanggapan kasama ang lahat ng stakeholders na makamit ang limang porsiyentong MPR ng nasyunal at ang malnutrition reduction program. Taunang itinataguyod ng National Nutrition Council ( NNC) at Department of Health (DOH) ang Regional Nutrition Award upang bigyan ng pagkilala o parangal ang mga kawani, tanggapan, pamahalaang lokal na mayroong malaking ambag sa pagtataguyod ng mga programang pangnutrisyon sa kani- kanilang mga lugar. Ito ay isa ring paraan upang patuloy na mai- angat ang antas ng kalusugan ng mga Filipino. ( OCJ/ PIA- MIMAROPA, Palawan)