Pagtayo ng medical school sa lalawigan, aprubado ng Sanguniang Panlalawigan

Aprubado na sa Sangguniang Panlalawigan ng Palawan ang resolusyon para sa pagtatayo ng medical school sa lalawigan. Sa panukalang resolusyon na inakda ni Board Member Eduardo Modesto V. Rodriguez, hiniling nito kay Gob. Jose Ch. Alvarez ang pagpapatayo ng Southern Palawan Medical School sa bayan ng Brooke’s Point sa pakikipagtulungan sa Palawan State University, isa sa pangunahing unibersidad sa lalawigan. Ang pagkakaroon ng eskwelahang nabanggit ay inaasahang magiging malaking tulong sa pagpapaigting ng serbisyong pangkalusugan ng pamahalaan at pagbibigay ng mas abot-kayang pag-aaral para sa mga nagnanais kumuha ng kursong medisina. Sa kasalukuyan ay kinakailangan pang lumuwas sa ibang lugar ng mga estudyanteng Palaweño na kumukuha ng mga kursong pang-medikal na nagiging dahilan ng lalo pang paglaki ng gastos ng mga ito sa kanilang pag-aaral. Ayon sa resolusyon, ang pagtatayo ng medical school ay tugon sa pangangailangan ng maraming ospital na nabuksan at bubuksan ng Pamahalaang Panlalawigan bilang bahagi ng programang IHELP ni Gob. Alvarez. Nagpapatuloy din ang tulong pinansyal nito sa mga estudyanteng kumukuha ng kursong medisina sa mga pangunahing unibersidad sa bansa. “We know this is really important because we have 10 hospitals that are under construction,” saad ni BM Rodriguez. “We need a lot of doctors sa mga susunod na taon at alam ko malaki ang maitutulong nito kaya ito ay isinusulong.”