NGCP matagumpay na napamahalaan ang pinakamataas na konsumo ng kuryente

PINATUNAYAN ng NGCP na ang ipinatupad nitong komprehensibong programa na pagpapalakas ng grid ilang buwan bago ang nagsimula ang tag-init noong Marso ngayong taon ay naging mainam sa mga gumagamit ng kuryente sa Luzon, kung saan tuloy tuloy ang pagtaas ng konsumo.

Lumampas ngayong 2017 sa pinakamataas na natalang gamit ng kuryente noong 2016. Maski ang sinasabing pinakamataas na gamit ng kuryente sa 2017 ayon Department of Energy ay nalampasan din. Ang aktwal na gamit ngayong taon ay umabot sa 10,054 megawatts noong ika- 9 ng Mayo na naitala ganap na ika 2:27 ng hapon. Ang kabuuang suplay ng kuryente galing a mga powr plant na dumadaan sa NGCP ay nasa 11,444 MW lamang. Ibig sabihin, 1,390 MW lamang ang natira para sa tinatawag na “operating margin” ng NGCP na kailangan para masiguradong tuloy tuloy ang daloy ng kuryente, at maiiwasan ang low voltage at low frequency na maaring makasira ng mga kagamitang de kuryente, at pwede din makadulot ng power interruption.

Hindi naramdaman ng mga residente ng Luzon ang epekto ng napakataas na pangangailangan sa kuryente dahil sa mga pagbabagong isinagawa ng NGCP sa kanilang mga pasilidad. Katunayan nito, pinag-ibayo ng NGCP ang pangangalaga nito sa mga kritikal na kagamitan sa mga substation, mas pinalakas ang mga operating measures ng mga transformer nito sa San Jose, Dasmarinas, Bolo at sa 500 kV substation nito sa Tayabas.

Ang inaasahang suliranin ng mababang boltahe ay nabigyan din ng angkop na solusyon sa pamamagitan ng napapanahong pagpapalakas ng mga kagamitan tulad ng “capacitor banks.” Napanatili ng Luzon System Operation ng NGCP ang system voltage level sa normal maging sa kasagsagan ng panahon ng tag-init.

Ikinalulugod na iulat ng NGCP na sa pamamagitan ng maagang pananaw ng grupong teknikal nito ay naagapan nito ang anumang maaaring maging suliranin sa suplay ng kuryente sa panahon ng tag – init, kahit pa ang pangangailangan sa kuryente ay lumampas sa inaasahang pangangailangan na tinukoy ng DOE.

Nananawagan ang NGCP sa gobyerno at sa publiko na suportahan ang mga proyekto nito na naglalayong mapalakas pa ang Sistema ng kuryente sa mga susunod pang taon. Iginiit din ng NGCP na bukod sa pagpapalakas ng Sistema ng transmisyon, na pinangangasiwaan nito, kailangan din bigyan tuon ang suplay ng kuryente, partikular na ang pagkakaroon ng karagdagang pinagmumulan ng enerhiya upang maragdagan ang numinipis nitong suplay.

“Nais naming matugunan ang patuloy na papalaking pangangailangan at suplay ng kuryente sa Luzon hindi lang tuwing panahon ng tag-init. Ang suporta ng lokal na pamahalaan, mga ahensya ng gobyerno tulad ng DILG, DENR at LLDA at gayundin ang publiko ay makatutulong sa NGCP upang lubos na maisagawa ang mga proyektong ito sa tamang panahon kundi man mas maaga sa itinakda,”panawagan ng NGCP.

“Gagawin naming ang lahat ng aming makakaya para pagandahin ang Sistema ng transmisyon ng kuryente. Pero kung kulang ang dadaloy na kuryente sa mga linyang ito, hindi di natin maiiwasan ang pagkaantala ng serbisyo ng kuryente.

Bahagi ng mga proyekto na nauukol sa lumalaking pangangailangan sa kuryente sa Luzon ay nakatuon sa pagdaragdag ng lakas sa Western at Eastern Manila Backbone na kabilang dito ang mga kritikal na gawain tulad ng 230-kV Pasay Substation, Taguig-Taytay 230kV line at 500kV Taguig Substation.

“Ang mga dakong ito ay na natukoy na pinaka-angkop sa mga planong proyekto, sa pamamagitan ng masusing pagsasaliksik at pag-aaral dahil sa pagiging malapit nito sa sentro ng paglago ng pangangailangan ng kuryente.. .Anumang pagkaantala ng pagpapatupad ng mga kritikal na proyekto gaya ng Pasay substation ay magbubunsod sa mga isyu ng overloading o labis na karga ng kuryente sa linya at posibleng pagkawala ng kuryente sa buong Metro Manila,” ayon sa kumpanya.

Dagdag pa ng NGCP, “ang pangangailangan ng kuryente sa Luzon ay patuloy na lalaki sa susunod pang mga taon. Katungkulan namin na matiyak na ang grid ay makapagpapadaloy ng kuryente mula sa mga generators hanggang sa kung saan man ito kinakailangan. Ginagawa namin ito sa pamamagitan ng patuloy na pagsasaayos at pagpapalakas ng grid at ilagay sa tamang dako ang mga teknolohiyang kailangan upang mapanatili ng NGCP na nakatutugon ito sa pangangailangan. Gagawin namin ito. Ito ang aming pangako.”

Ang NGCP ay isang pribadong kompanyang pinangungunahan ng mga Filipino na itinalagang mamahala, magpanatili at magpaunlad ng mga liya ng kuryente sa pangunguna ng pangunahing shareholders nito, sina Henry Sy Jr at Robert Coyiuto, Jr.