Talupangdon kag tadlungon

MADINALAG-on ang pagsaulog sang kahiwatan. Masami naton ini nga ginasambit bisan pa nga may mga kakulangan ukon kapalthan nga nagluntad. Luyag lamang sang isa ka organisasyon nga bisan pa sang mga kakulangan, wala ini nagasablag sa tayuyon nga dalagan sang aktibidades. Gani, dapat manindugan nga madinalagon gid agud nga makahatag sang inspirasyon sa mga nagatrabaho agud nga ipadayon pa gid ang ila paghimakas tubtob sa masunod nga paghiwat sang sini nga hilikuton.

Indi naton makwestyon ang ila deklarasyon suno sa ila pagbanabana sa sitwasyon. Apang may kaugalingon man kita nga nakita nga dapat hatagan sang igtalupangod.

Katuyuan naton nga i ndi magpakamalaut kundi ipahibalo sa ila nga dapat hatagan igtalupangod ang isa ka bagay nga posible wala nila natalupangdan ukon wala nahatagan sang atensyon.

Una, gintalupangod ko gid ang pamaagi sang aton security personnel sa pagsulod mo sa syudad gikan sa distrito sang La Paz ukon ang entrada nga yara sa Forbes Bridge. Naabtan ko sang Sabado nga tuma ka laba sang pila sang mga lugay magsulod kag may isa lang ka linya para sa babaye kag isa man para sa lalaki. Nangin makuri ang pag-inspeksyon tungod nga ginsimbog nila ang may bag kag wala dala nga bag.

Kuntani, ginhimo nga duha ka linya para sa babaye kag duha man para sa lalaki. Ang isa ka linya dapat para sa wala dala nga bag kag ang isa may dala nga bag agud madasig ang pagsulod sang tawo kag indi magpatial sa initan.

Nakalab- ot man siguro sa palamatin-an sang mga natungdan ang akon reklamo gani nga sang Domingo sang aga wala ako may naabtan nga linya pasulod sa city proper.

Ikaduha, posible nga kumbinsido na ang aton kapulisan nga wala sang peligro nga magaluntad sa syudad sang Iloilo samtang ginahiwat ang mga pagpasundayag sang mga tribu bisan nga wala sang may ginpatuman nga signal shutdown. Kabay pa nga napanas na sa ila paminsaron ang pagsalig sa signal shutdown agud nga mahatagan sang seguridad ang pumuluyo.

Kabay pa nga sa sunod nga paghiwat sang Dinagyang indi na sila mag-insister pa nga ipatuman liwat ang signal shutdown.

Ikatatlo, dapat wala ginpakipot todo ang alagyan sa Bonifacio Drive paagi sa pagbutang sang mga tolda sang mga kiosko sa magtimbang nga karsada nga nagasaklam sa tagsa ka magtimbang nga linya para sa salakyan. Gin- usar pa gid nila sa ila likod ang alagyan nga para kuntani sa nagalabay nga pumuluyo. Nagresulta ini sa pagpugok sang tawo kag salakyan nga halos wala na naghulag sadtong Sabado sang gab-i kag nabudlayan nga makalusot ang ambulansya nga may dala nga pasyente.

Ikaapat, kuntani ginaligwahan ang alagyan sang mga nagapasundayag nga mga tribu, ilabi na nga may madamo kag dalagku sila nga kagamitan, kaangay sang backdrop, nga ginakarga sa dalagku nga trak. Nabudlayan ang mga tribu nga magmaniobra sa kitid nga alagyan nga nagaresulta sa tuman ka atrasado nga pagsulod kag paggwa nila sa performance area.

Kuntani, i-regulate man ang mga kompaniya, ilabi na kon dalagku nga sponsor, sa pag-usar sa mga dalanon nga dapat indi makasablag sa hulag sang mga tribu.

Dapat man nga may nagagiya sa mga Very Important Person ukon VIP kon sa diin sila dapat magsulod kag magpadulog sang ila salakyan agud nga indi makasablag sa paghulag sang mga tribu.

Sa bahin sang judging area No. 2, may isa ka senador nga naglabay sa kilid sang mga naga- perform, maayo lang nga wala man siya naigo sa hakyaw ukon habyog sang mga props sang dancers/warriors sang mga tribu. Indi sila dapat maglabay sa performance area agud nga indi sila makatublag sa pasundayag. Mas malaw-ay pa tungod nga ang ila salakyan nagbalabag sa alagyan sang nagapagwa nga tribu, gani mas temprano siya nga nagpanaog sa entablado agud nga magbiya sa lugar kag mahawanan ang alagyan.

Dapat ipahangop sa mga bisita nga wala sang kay magwa kag magsulod samtang may nagapasundayag nga tribu agud nga indi masamulak ang

nagapasundayag kag ang tumalan-aw sang ila performance.

Kon luyag sang mga VIP nga magsulod sa judging area, dapat mag-coordinate ang ila staff kon pwede na makasulod sa area kag makasaka sa stage.

Kaangay sila sang mga pasayud sa manami nga talanawon. Indi ini political rally nga para sa ila. Dapat magpasunaid sila sa mga tumalan-aw.

Ginapatpat naton ini agud nga makahatag man sang ideya sa nagadumala sang kahiwatan sang Dinagyang agud nga sa sunod nila nga pagplano kabay n gail am ak on side r ark ag matadlong ang mga bagay nga dapat tadlungon agud nga indi na masulit ang gintumod ko nga mga sitwasyon. ( bertladera@ gmail.com/