Pamahog ni Duterte

ANG pulitiko praktikal sing panghunahuna. In fact, wala ini sing permanente nga lealtad bisan gani sa iya partido kag sang prinsipyo nga ginatindugan sini tungod sini.

May kaugalingon ini nga pananaw nga dulot sang iya “free will” nga ginhatag sa tawo sang Diyos, nga bisan si Adan kag si Eba may kaisug sa pagsupak sa sugo sang Diyos nga ginkabangdan ugaling sang pagpalayas sa ila sang Diyos.

Kon kis-a, matuod, indi magsantu ang panan-aw sang isa ka pulitiko sa tindug kag bisan sa sinumpaan nga prinsipyo sang iya partido. In fact, pwede sini ligwaton ang iya una nga tindug.

Indi ugaling naton mapakanubo ining pulitiko sa iya pagligwat sing iya panindugan kon amo gid man ina ang maayo para sa iya ginasakupan. In fact, indi naton masiling nga butigon siya. Naghimo lang siya sang sala nga pagpati nga kinahanglan niya baguhon para sa kaayuhan.

Por ejemplo lang ang panindugan ni President “BongBong” Marcos Jr. ( PBBM) parti sa relasyon sang Filipinas sa United States sa iya pagpanguna sa Foreign Relations sang pungsod.

Sadtong presidential campaign, siling niya: “If you let the U.S. come in, you make China your enemy.” Kon sa aton pa, indi siya comforme nga liwat mapabakod ang relasyon naton sa U.S.

Sadto, panindugan ini Duterte ang magpaayon-ayon lang sa China sa aton problema sa 200-Nautical mile Exclusive Economic Zone (EEZ) sa West Philippine Sea tungod, kon indi gid man kahadlok sa China, mas gustuhin gid man niya ang pagpakigabyan sa China sangsa U. S. sa iya mismo ginapakita nga pagpakalain sa naulihi.

“Ngaa?” tugda ni Pedro sa pagpakig-ugyon sadto ni PBBM sa panindugan ni Duterte, “Indi bala nga ang ila pamilya ginluas sang United States sa kapahamakan? In fact, ginkuha pa sini sa Malakanyang ang Marcos family paagi sa helicopter pakadto sa nagahulat nga salakyan pang-gyera sang US kag gindul-ong sa Hawaii agud indi na malab- ut sang naga-rebolusyon nga mga tawo sadtong Edsa 1986. Kag karon kontra na sang iya pamilya ang U.S.? Wala kabalaslan!”

***

Sa nasiling ta na, praktikal ang isa ka pulitiko, kag si PBBM indi exception. In fact, indi na niya kinahanglan mag- sorry pa sa pagbaylo sang iya pamensaron. Expected naman ina sa kada pulitiko.

Kon nahambal ato ni Marcos Jr. sadtong presidential campaign, ina tungod gapabilin pa sadto ang popularidad ni Duterte kag, syempre, daku ang mabulig ni Duterte sa iya eleksyon.

“Marcos Jr. owes his victory to Duterte,” siling pa gani sang mga sumulunod gihapon ni Duterte.

Apang karon kay wala na si Duterte kag si Marcos Jr. na ang Presidente, pwede na siya maghimo sing panindugan ayon sa iya matuod gid nga pagpati para sa kaayuhan sang mga pumuluyo kag sang pungsod.

Balik na siya sa pagpakita sing kabalaslan sang iya pamilya sa U.S.

In fact, ind lang sa amo na nga rason. Nakita man ni PBBM ang kaayuhan sang pagpabaskug sang pagpakig-abyan sa U.S. – ang kinahanglan nga pagpabakod sang aton Mutual Defense Pact sa U. S. batok sa pang-“bully” sang China; ang pagpabakod sang relasyon sang Filipinas sa mga pungsod nga luyag pabakuron ang human rights sa Filipinas bilang katapo sang UN Human Rights Council, nga nangin kwestyonable tungod sa Duterte Drug War nga linibu nga “suspects” ang napatay; kag ang ma-imbestigaran gid ang Drug War ni Duterte sa reklamo nga wala sing “due process” ining mga pagpamatay.

Akig si Duterte sa pagpasulod sa pungsod sang imbestigasyon sang International Criminal Court sa Duterte Drug War. Matuod ginahambal ni PBBM nga wala siya gapati nga may hurisdiksyon ang ICC sa akusasyon nga “Crime against Humanity” batok kay Duterte ugaling wala naman ini nagaupang sa pagsulod sang ICC investigators.

In fact, nakapakigkita na gani ang ICC rapporteur sa Dept. Justice kag sa iban pa. Sunu gani kay anay Senador Trillanes, tapos na ining imbestgasyon sang ICC kag basi mahulugan na sing “Warrant of Arrest” si Duterte sa akusasyon nga “Crime against Humanity”.

***

Kon ano na lang ang ginahimo niDuterte kag sang mga supporter agud gub- on ang gobyerno ni PBBM, nga mayor diri ang pagpabulag sang Mindanao sa Filipinas.

Naham-ot sini ang madamo. Man bisan ang mga Muslim sa Bangsamoro wala gana sa sining proposal ni Duterte.

In other words, usik lang ini sing laway nga indi ma-justify sang bisan sin-o man nga tadlong ang panghuna-huna.

Nonetheless, namahog na si PBBM nga gamiton ang bug-os nga pwersa sang armado nga kusog agud indi matabo ang liwat nga kinagamo sa Mindanao tungod sining sugyot ni Duterte nga bulagon ang Mindanao sa Filipinas. “Don’t try me!” pamat-ud pa gani sini./ PN