Filipino bilang Asignatura

Ang Filipino ay isa sa mga asignaturang itinuturo sa mga paaralan sa buong bansa simula unang baitang hanggang kolehiyo. Dito sa asignaturang ito tayo natutong kilalanin ang ating sarili, ang ating kultura at kaugalian, pananalita at ang ating aydentidad bilang isang Pilipino. Mula sa pagbigkas abakada, hanggang sa pagkatutong bumasa ng mga salita, parirala hanggang sa mga sanaysay at nobela lahat ito ay natutunan natin sa ating asignaturang Filipino. Sa pagbabago ng panahon ay tila ba nagkakaroon din ng mga pagbabago sa pagpapahalaga natin sa asignatura. Malimit ito ay isinasawalang-bahala dahil para sa iilan ito ay lubhang madaling pag-aralan. Ilan sa mga kabataan sa ngayon ay hindi na nahihilig sa pagbabasa ng mga kwentong nakasulat sa wikang Filipino bagkus ay mas nahuhumaling sa mga kwentong Ingles o mga banyagang mga salita katulad halimbawa ng Korean nobela. Maging sa social media malimit ay nagkakaroon ng pagkakamali sa paggamit ng ating sariling salita o hindi kaya’y nagagamit sa maling paraan sa pag-usbong ng mga salitang iilan lang ang nakakaunawa. Tila nakakalimutan natin ang sariling ganda ng ating wika na namana pa natin mula sa ating mga ninuno. Nariyan pa ngang minsan ipinanukala na alisin na ang asignaturang Filipino sa kolehiyo at ilagay na lamang ito sa mga senior high school. Marami ang tumutol sa panukalang ito dahil ito ay isang kawalang-paggalang sa ating wika, sa ating pagkakakilanlan at pagmamahal sa ating bayan. Hindi dapat na alisin ang asignaturang Filipino sa lahat ng antas ng paaralan sapagkat ito ay pagkakataong mabigyang-pagpapahalaga natin an gating wika at kasarinlan. Dito natin namumulat ang ating kamalayan sa ating sariling wika na hindi mula sa alin mang banyagang bansa. Sa ngayon, ang asignaturang Filipino ay nananatiling buhay sa bawat mga paaralan at patuloy na itinuturo sa mga mag-aaral. Nawa’y pagtuunan ng pansin at pagpapahalaga ng mga mag-aaral ang pag-aaral sa asignaturang Filipino at maisapuso nila ang kahalagahan nito sa ating kasaysayan, kultura at pamumuhay.( Contributed article)