Moderasyon sa AI: Daan sa Makataong Pamamahayag
“Hindi kinakailangang palitan ng AI ang mga taong naglaan ng ilang taon sa pag-aaral ng tamang pamamahayag.”
Nagpapatunay ito ng panindigan ng University of the Philippines Broadcasting Association (UPBA) ukol sa paggamit ng Artificial Intelligence (AI) sa larangan ng dyurnalismo. Sa kasalukuyan, pinapakinabangan ang AI sa paraang nakapagbubuo ng mga imahe, boses, at artikulo para sa madaliang pamamahayag; dito nagsimulang sumibol ang isyu ng teknolohiya bilang halili sa tradisyunal na midya. Kung iisipin, kagaya ng UPBA: hindi kinakailangang akuin ng AI ang trabaho ng tao sa paghatid ng balita; bigyang-moderasyon lamang ang paggamit.
Una, binanggit sa saliksik ng Data & Society at Algorithmic Justice League, potensiyal na makapaglikha ito ng bias sa mga balitang nasa midyang sosyal. Nakaprograma ang AI na ayusin ang lumalabas sa ‘news feed’ ayon sa nais suriin ng tao; naaapektuhan ang sari-saring impormasyong inihahatid sa madla at representasyon ng mga komunidad na nasa laylayan – patunay na mas mainam paring tao ang mamamahayag; nasusulong ang inisyatibo ng pagkakaiba-iba.
Pangalawa, mawawalan ng koneksiyon sa pagitan ng tao kung AI ang papalit. Pangunahing bahagi ng pamamahayag ang paglahad ng kuwento at komunikasyon sa madla gamit ang kapangyarihan ng salita. Hindi mapapalitan ng AI ang pagkamaunawain, pagkamalikhain, at kakayahang makiramdam ng mamamahayag sa pagkuha ng atensiyon ng manonood at paghatid ng personal na karanasan.
Pangatlo, sa pag-aaral ng McKinsey & Company, tinatayang 30% ng mga gawain sa 60% mga trabaho ay pinapatakbo ng teknolohiya, kaya naaapektuhan ang tungkulin ng dyurnalismong sumiyasat ng impormasyon at rumepaso ng datos. Dulot nito, nasasakripisyo ang natural na intuwisyon, tiyaga at etikalidad ng tradisyunal na pamamahayag – mga katangiang hinding-hindi mapapalitan ng AI, kahit pa man malaki ang pakinabang nito sa pagkilatis ng datos.
Bilang solusyon, kinakailangang pairalin ng mamamahayag ang kapangyarihan ng paglalahad sa impormasyong makatotohanan. AI lamang ang magsisilbing tulong at tagamungkahi, habang nasa mga ahente ng dyurnalismo parin manggagaling ang paunang salita at pangwakas na artikulo. Bilang mamamayan, marapat ding gamitin ang sariling boses sa paglahad ng saloobin, upang mapanatili ang esensiya ng tradisyunal na dyurnalismo – ang pagiging boses ng tao.
Samakatuwid, hindi pamalit sa mamamahayag ang AI. Nagisilbing kaagapay lamang ito sa kalidad na dyurnalismo. Ibig sabihin, moderasyon sa paggamit ng teknolohiya, kasama ang patuloy na pakikisabay ng mga mamamahayag sa pagbabago-bago ng lipunan ay ang daang marapat tahakin para sa epektibo at makataong pamamahayag. (Contributed article)