Impeachment vs. Duterte ken Robredo... Susmaryusep!

MARIAKUSINA a nakusel... nia met ti mapaspasamaken ditoy Pilipinas. Sipud nangabak ni Duterte... saanen a napugsat dagiti nakukusel ken agsisipol a kontrobersiya nangruna iti pulitika. Sipud mayor daytoy agingga iti agdama, simmursurot latta dagiti basnot kenkuana gapu laeng iti extra judicial killings. Daytoy ket inrugi idi ni sigud a CHR head a ni Sen. Leila De Lima. Agingga ita a nakakulongen ti senadora gapu iti kaso ti illegal a droga... imbes a maikupin dagiti napalabas (EJK), ad-adda met a narubruban. Kinapudnona, uray addan iti selda ni Leila... agbusbusi latta ti ngangawna iti tulong ni Sen. Trillanes. Isu a kuna dagiti makaawat: sumaksakay laeng kano ni Trillanes tapno makaala iti nagan ken simpatya dagiti umili. Ngem ti saludsod: adu ngata met ti mamati kenkuana? No adu ti mamati, apay a nakulelat idi timmaray a para bise presidente? Wenno nangato unay met ti lagto ken kalay-atna? Di na ngata ammo a no kasano ti kangato ti ambisyonmo... isu met ti kauneg ti pakailumlomam no matnagka? Sige, subliantayo manen ti isyu ti impeachment:

-o0oTapno adda met pamalpalatpatan ti kaadduan... babaen iti linteg ti pagilian, impeachment ti maysa a pamusposan tapno madistugawmo ti presidente ken uray ti bisena. Ngem masapul a magna daytoy iti proseso. Maamiris ti ramen ken dagsenna idiay Lower House santo maipasa para iti litigasyon idiay nangatngato a pagpandayan iti linteg – Senado. Napasamak daytan kenni nagpresidente Manila Mayor Erap Estrada... ken daydi Justice Corona. Ita gapu siguro ta saanda a kuntento iti panangituray ni Digong... kimmamangdan iti impeachment. Nagtudo a sigida dagiti saludsod. Makalusot ngata ti impeachment idiay House no ad-adu nga amang dagiti pasurot ti administrasyon kadagiti agbotos a representante? No saan a makalusot... natural, maeppelan. Kasla tay tambutso ti trak a napullatan iti bato. Anianto ngata met ti sumaganad a mapasamak? He he... agaammotayon, pards. Dinto maikkat ti atap a pagpudotandanto dagiti tattao nga adda iti likudan ti impeachment. Iti ababa a pannao: ballatek wenno karma. No kadagiti bengatibo a tao, dayta ti bales. Ngem no dakami ti masurot... di koma met mapasamaken dagita nga eksena no mabara ti impeachment. Agmaymaysada koman nga umaddang para iti pagimbagan ti kaadduan. Tay awanen ti kontrabida. Ngem kasanon dagiti tallo ti dilana? Dagitay tarabitab a tila salsalawasawenda tapno mapagsasaritaan laeng ti naganda? Dagitay ngay natayok ti ambisyonda? Amangan ta kayatda ti agbalin a presidente. Maryusep! Amangan ta uray barangay kapitan ket dida pay makalusot, pwe! Su nga agtalnakayon tapno aglimpiyon ti pagilian!

-o0oNo ti maysa a rason iti impilada nga impeachment kontra Digong ket ti panangakona nga adda pammalubosna iti China tapno agsukisokda iti maysa a disso a sakup ti pagilian (Benham Rise)... adda ngata konkreto a dokumento a mailatagda iti impeachment court nga adda pammalubosna? Ammotayo metten ti dila ni Digong. Uray imbagana ngem aturennanto met laeng. Amangan ta nakailawan laeng iti sao gapu iti pudot ti piditpiditna? Dagita man dagiti pangngarig ken panirigan dagiti analayst. Ngem no ti nakaikugnalan ti impeachment ket ti kinatarabitna nga iti biang ti dadduma ket nakaam-amak a mabalin a pakaisagmakan dagiti komentona. Nabayagen a nasungbatan ni Digong dagita , kunada. Ngamin ket inakona a dayta ti talaga a kinataona. Dinan mabaliwan pay. Ti napateg, agtrabtrabaho ti presidente. No rukodentayo ngamin ti nagappuanannan kontra illegal a droga, awanen ti makaartap uray agtetepkel pay dagiti naglabas a rehime. Rinibon dagiti nabalud, naitumba , ken adu pay dagiti adda iti narco-list a sumaganad a maarado no dida agbaliw. Ita laeng a panawen a naibutaktak a manipud barangay agingga iti nangangato nga agtuturay ket karaman gayam iti illegal a droga. Isu nga adu ti kumonkontra kenkuana gapu ta imbutaktakna dagiti riper ti kagimongan gapu iti illegal a droga. Ania a rehime ti nakaitured a mangpung-ir iti ngipen ken sangi kada sara dagita nga adipen ti droga? Iti apagbiit laeng a panawen... naipakitana ti tibker ti tungtungpalenna a karina. Iti agdama, maisarunon ti addangna kontra korapsiyon ken kriminalidad. Aniapay koma ti kurang? Tsk tsk... dagita ti nasirip dagiti kontra-Duterte isu a nagaramidda iti pamusposan tapno pilayenda ti programana. Isu nga adda ti impeachment. Saludsod manen: pagpatinggaan ngata dayta nga impeachment? Arasaas: amangan ta agsaysayangda laeng manen iti panawen dagita nga agimbestigar. Kuarta dagiti taxpayers (umili) ti maaramat dita. Saan ngata a sayang?

-o0oDipay nagnadnad ti kontrobersiya nga impeachment kontra Pres. Duterte... kasla bomba atomika met a pimmutok ti baro a kontrobersiya: impeachment met kontra kenni Bise Presidente Leni Robredo. Ta ania koma met ti nakaikugnalanna? Malagipyo kadi nga itay laeng nabiit... adda video message ni Robredo sadiay United Nations a nangibutaktakanna nga adda kano mapaspasamak a “Palit Ulo Scheme” ti kampanya ti gobyerno ti Pilipinas kontra illegal a droga. Nadagsen ti alegasyon ti bise presidente, kas kuna dagiti analysts. Nakaibabainan ti sibubukel a pagilian. Kunada: no koma ta ditoy laengen pagilian ti nangipakitaan ni VP Leni iti concern wenno panangisakitna iti kailianna... amangan ta naipangag a sigida ken naaksiyonan koma a dagus. Kinapudno, kuna ti mismo a sekretaryo ti Turismo ti pagilian: dakkel ti negatibo nga epekto ti inaramid ni VP Leni iti turismo ken panagnegosyo ditoy Pilipinas. Arig amin a disso iti sangalubongan... EJK ken Palit-Ulo ti inda amamaden. Nadagsen ti epekto ti mensahe ni VP Leni. Dayta ti nangiduron kada Atty. Oliver Lozano ken Melchor Chavez iti panangipilada iti impeachment kontra iti bise presidente. Kas kuna dagiti dua... katupag ti inaramid ni Leni ti kaso nga Culpable Violation of the Constitution ken Betrayal of Public Trust. Kinapudnona, addan iti opisina ni House Speaker Pantaleon Alvarez ti kopya ti impeachment complaint kontra iti bise presidente. Ditan a maadal ti linaon ken porma ti complaint sakbay a maaktuan a kas mayannurot iti paglintegan. Maryusep, kailian! Ita laeng a napasamak ti kastoy iti pakasaritaan ti Pilipinas. Aggiddan a napilaan iti impeachment ti Presidente ken Bise Presidente! Kuna dagiti sutil: talaga a sikat unayen ti Pilipinas. Ngem no sibibiag daydi lolok, maymaysa laeng ti ammok a komentona: PWA!!!

-o0oUray nabayagen nga iti six feet below the ground daydi lolok... kasla maal-allingagko dagiti adu a saludsodna a ti laeng masakbayan ti makasungbat. Ania dagita a saludsod? Mabalin a: malpas ngata iti terminona ni Pres. Duterte no maibase iti edad, salun-at, kinadagsen dagiti agdama a kontrobersiya a sangsanguenna? Ti masakbayan ti makasungbat, ulitenmi. Ngem no dakami ti saludsodenyo: rumbeng koma a malpasna ti terminona tapno maipatungpalna amin a karina iti sangapagilian. Ikararagtayo. Adios mi amor, ciao, mabalos!