Aniniwan ti Martial Law... nadagsen a karit!
ITAY nabiit, medyo nakaangestayo iti nalukay no panggep iti panaglablabes idi panawen ti Martial Law (Marcos regime). Ngamin, inawaten dagiti biktima ti Martial Law ti pauna a bayad-danyos kadagitoy. Kaibatoganna a pudno nga adda panaglablabes ti regime iti dayta a panawen. Ti apges dagiti pasamak ket mabalin a naep-ep nupay ti lamma ken piglatna ket dinto mapunas. Ngem adu pay laeng ti agtutuon kada agkakawil a salsaludsod. Maysa ditan ti pudpudno kano a hustisya numona ta addada pay laeng iti takem dagiti miyembros ti pamilya Marcos. Pudno nga adda pay laeng kadagiti korte dagiti kaskaso kontra kadakuada nupay addan dagiti nadismiss. No kaanunto a maungpot dagita a letigasyon, panawen laengen ti makasungbat. Dagitoy ket iti salemsem ti Martial Law idi. Ngem ita, adda manen baro a deklarasyon ti Martial Law nupay idiay pay laeng Mindanao. In short... ti aniniwan daydi immuna a Batas-Militar ket in-inut sa manen a bibiagen ti agdama a panawen. Intay man sukimaten dagiti paspasamak sakbay ti Martial Law declaration idiay Mindanao:
-o0oSakbay a nagluas ni Pres. Duterte a nagpaRussia para iti lima-aldaw a misyonna kas sungbatna iti kiddaw ni Russian President Putin... adu dagiti parikut a pinanawanna. Maysa ditan ti isyu ti baro a linteg (Anti Distracted Driving act-ADDA) a nagbalin a kontrobersiya. Ngem napateg ngamin ti misyonna idiay Russia. Napateg ken kontrobersiya dayta a panagsango kas kaunaan a pasamak iti pakasaritaan ti Russia ken Pilipinas. Intugot ti presidente iti nasurok duagasut a negosyante ken nangangato nga agtuturay tapno mapatalged ti relasyon ti dua a nasyon nangruna iti pa-negosyo, seguridad ken adu pay. Malagip pay nga iti ililikud ti presidente... dimmegdeg dagiti parikut iti ADDA a nagtungpal iti pannakasuspindir ti implementasyonna. Adu ngaminen dagiti saan nga agtutunos ken agkikinnawatan gapu iti ramen ti IRR ti nakuna a linteg. Ti sentro ti linteg ket ti pannakaiparit iti panagaramat iti aniaman a ramit-elektroniko bayat ti panagmaneho. Ngem nagsangasanga ti kontrobersiya idi nairamanen (kano) a maiparit dagiti aniaman a mabalin a makasamben iti panagmaneho... kas koma dagiti adda iti “line of sight” a pakairamanan ti “rosaryo”. Ditan a nagtignay ti senado tapno maipasardeng pay laeng ti implementasyon ti nakuna a linteg. Kayatna a sawen... dalusanda pay nga umuna dagiti pagannurotan tapno awanen ti parikut iti implementasyon. Saludsod: apay ngamin aya ta impasayo dayta a linteg a dikay lininay a naimbag. Nakusel pay laeng, ipalamutyon. Sinno met koma ti mayat a mangan iti nakusel? Bag ketdi ta naungkaken daydi lolok. Ta no saan, barsakennakayon iti sangasilyasi nga ITTIP, pwe!
-o0oIdi simmangpet ni presidente idiay Russia... nabara a pannarabo ti napasamak. Kunada: adu ngamin ti pagpadaan ti ugali ken kababalin dagiti dua a lider (Duterte ken Putin). Kinapudnona, maysa a misyon ni Digong dita ket pannakagatang iti precision bombs a mabalin kano a maaramat kontra kadagiti terorista. Tay met koma mas high-tech ngem kadagiti kadaananen a ramit-militar. Kas iti mensahe ni Digong idi nagawid (airport press briefing), awan kano iti saan kadagiti kiniddawna. Adda pay ketdi idi damag a no idiay Russia ti panggatangantayo iti armas... uray kano “buy one take one”. Mayat, saan aya? Kaslatay la gumatgatang iti tarong, este, sapatos. Kasla naipasadya wenno naitani a pagteng ti misyon ni Pres. Duterte panggep iti armas ta ngamin katibok ti kaaddana sadiay Russia, pimmutok met ti damag a sinerrek dagiti terorista a Maute ti Marawi tapno tulonganda ni Abu Sayyaf leader Hapilon a naipit sadiay. Naammuan a sigida ni Digong ti napasamak... pannakauram ti maysa nga eskuelaan, naserrek ken nakamkam nga ospital, napuoran a simbaan ken pannakadukot ti maysa a padi ken layofficersda, pannakatay dagiti kameng ti AFP, PNP ken sibilyan ken aminen a mapaspasamak iti dayta a panawen. Sigida a nangeddeng a din nagpangaddua ni presidente. Inkeddengnan a suspindiren ti misyonna idiay Russia a kinagiddan ti deklrasyonna iti Martial Law iti sibubukel a Mindanao. Ngem sakbay a nagluas nga agawid ditoy pagilian, nakasarita met laeng ni Digong ni Pres. Putin iti uneg ti maysa ket kagudua nga oras. Adu ti napapateg a nagnummuanda. Nagbati met ni DFA Sec. Allan Cayetano para iti dokumentasyon. Ket idi simmangpet ti presidente iti NAIA, madlaw a nakaem ti sangina... pormal a simmango iti media. Ditana nga impeksa dagiti sumagmamano a rason iti likudan ti deklarasyonna. Ditana nga inibbatan ti pangtana a no tumaray dagiti terorista iti Kabisayaan, mabalinna a palawaen ti sakupen ti Martial Law a pakairamanan ti Visayas. Ket no dumappatto dagiti terorista iti Luzon... impir-ak ti presidente a mabalinna nga ideklara ti martial law iti sibubukelen a pagilian. Mariakusina impusipos elementary school annex! No mapasamak dayta... nabukelen ti ANINIWAN ti Martial Law daydi Marcos, saan aya? Kasla Part 2 daytoyen no koma ta pelikula. Bag pay daydi lolok ta dinan marikna ken masaksian ti ibunga daytoy baro a martial law. Ti laengen AL-ALIANA ken ANINGAASNA ti mabalin a makibiang kas pangarigan. He he..lolo, inka laengen agbuya iti “all the way down” dita ig-igid bareng ta AGUNGARKA. Ngeee!
-o0oSaludsod: apay kano a martial ti maaramat tapno masolbar dagiti parikut dita Mindanao? Awan kadin ti sabali a dalan tapno saan nga agpipinnatay dagiti agkakadara ken agkakapuli ken agkakailian? Sabagay, manon a regime ti naglabas. Addan dagiti impakpakatda a pamkuatan ken gannuat tapno mapatalnada ti nariribuk a Mindanao. Ngem awan met napasamak. Ad-addan sa met kano a kimmarkaro ti problema nangruna iti peace and order wenno terorismo. Kasla kano pay ketdin immadu dagiti grupo a kalaban ti gobyerno dita. Adda regime a nagkuna a pulbusendan dagiti terorista kas koma dagiti Abu Sayyaf, Kidnap for Ransom groups ken dadduma pay. Ngem awan met resultana. Imbes a napulbos, nagwarasda pay ketdi ta nagdappatda payen aginga idiay Bohol manipud Sulu, Basilan ken dadduma pay a nagkutaanda. Ti imasna, adda payen dita ti BIFF a kunada a sabali pay a grupo a responsible kano iti Mamasapano masaker a nakatayan ti adu a SAF members. Agpapan ita... dipay nasudek dagita a grupo. Amangan ta nagpaaduda pay ketdin kadagitoy a panawen... a kas met ti ASG ken Maute. Kayatna kadi a sawen a nauman ti gobyerno iti ar-aramiden dagita a terorista no apay a kinamangnan ti deklarasyon ti Martial Law? Kunada: ad-adu kano ti matay nga inosente no prontalan a makirinnupak ken makiinnibus ti Militar-PNP kadagitoy a terorista. Sabagay... kuna ti AFP a dida agaramat iti Air Strikes idiay Marawi ta agdedekket dagiti babbalay. Estilo-Surgical attack kanon ti aramatenda. Maudi a saludsod: ayanda ngatan dagita a terorista. No gasut ti immatake, apay a sumagmamano laeng kano ti napapatay? Maibus ngatan dagitoy (Maute, ASG, etc) ita ta deklaradon ti Martial Law? Padaanan! Adios mi amor, ciao, mabalos!