Kontrobersiya...agrarapiten nga agsisipol!

KASALBAGAN ti amin a sinalbag! Agrarapit, agsisipol kada agtutuon ken agsasarumbinit metten dagiti kontrobersiya ditoy pagilian. No koma prutas..agrurutongen ti burtongna. Ala, sige, ibuksilantayo amin man dagita bareng marsaak dagita a kurikong:

-o0oSipud nagtugaw idiay Malakanyang ni Presidente Digong saanen a nagsardeng dagiti eksena a nangubor kenkuana. Barsak dita ken idiay ti inaramid dagiti kontrabida iti biagna. Di ngarud ammo no ania ti adda kenni ni Pres. Duterte ta agingga iti agdama, agtudo dagiti pammadakes kenkuana. Adu ti saan a kuntento. Wenno ania aya ti pudpudno a makagapu ta pagayayatda a palsiitan ti kinataona? Wenno apalanda laeng iti naidumduma a galadna: nasirib, natured, natarabit, trabahador, awanan palimed, ken napartak a mangeddeng nupay adda met kano pumalso nga addangna. Sabagay, kunada..ammona met ti mangrikna ken agdespensa no ammona a nagbiddut. Dagita dagiti mabalin a kaledadna no apay a kasla naluom a bunga a pagay-ayatda a barsaken. Para kenkuana...barsakenyo latta daytoy agingga iti maumakayo ta inton maibusen ti bato a pagbarsakyo, isuna met ti sumublat, ngek!

-o0oNo intay lagipen ti napalabas...tunggal agpinal ti sauna kadagiti otoridad, sangkaibagana idi nga adda daytoy iti likudanda aniaman ti aramidenda bayat panangitungpalda iti pagrebbenganda. Dayta met siguro ti nakagapu no apay nga adda kano dagiti dimmakkel ti ulona. Adda dagiti saan a nagamak a nagaramid iti panaglablabes gapu ta ammoda a kabigen pay laeng ida ni Digong kas inkarina. Dayta met ti mabalin a gapu no apay nga adda dagiti napaspasamak a panagabuso iti akem. Nagbalin dagiti dadduma a kasla berdugo wenno kasla agila a simmippayot kadagiti piyek ti kagimongan. Adda pay dagiti reklamo nga imbes nga isuda ti agipatungpal iti paglintegan..isuda payen ti maireklamo a kas kriminal. Ngem gapu iti panangisakit ni presidente...dida nagamak a nangituloy iti aramidda a killo. Dayta dagiti eksena idi. Banag a nangin-inut a nagbaliw iti agdama. Mabalin a nakita ken nasiripen ni Digong ti kinapudno dagiti maidandanon kenkuana a paspasamak. Nakadidillaw itan ti nangemkem a sangina kontra kadagiti nagtaltalkanna. Nagballaagen ti presidente. Tsk tsk...kinapudnona, adun kadagiti nagtaltalkanna ti kinastigona uray pay nadekket a gayyem wenno kabaddungalanna. In short...nakariingen ni Digong. Kunada: sapay koma ta dinton agtuglep.

-o0oNasirib ni Digong kunada. Nupay pudno a natured...inaramatna ti siribna nangruna iti isyu ti West Phil. Sea. Imbes a deretsa a bumasnot kontra China...al-alaenna iti diplomasya iti amin tapno saan a dumegdeg ti sigalot. Pudno ti kunana nga awan gaway ti Pilipinas no gubaten ti Tsina. Arigtayo laeng ti kuto no idilig iti puwersa ti China. Ngem saanna a kayat a sawen a kinatakrot ti takder ni Digong. Adda dita ti panangisakitna iti biag ken pakabuklan ti Pilipinas babaen iti saan a nadarasudos a pamusposan. Saanna nga imbasnot dita ti kinadursok ken kinatarabitna nga agsasao no di ketdi, natanang a pannakaaramat ti sirib tapno di agresulta iti