Marawi...ania ti sumaganad?
Saludsod...! Kalpasan ti Marawi...ania ti sumaruno wenno sumaganad? Wen, aya! No mairingpasen ti gubat-Marawi...sadino ti sumaruno? Nalpas kadin ti tensiyonMindanao? Ania dagiti sumaruno a mapasamak wenno eksena? No dakami ti inkay pagmadan...adu pay apo ti rumbeng a maasikaso. Kas koma kadagiti sumaganad:
-o0oUmuna...kasanon ti biag dagiti napadisi nga agindeg iti sibubukel a Marawi? Pagawidanda? Adda pay kadi balay wenno pagtaengan a sublianda? Kasano no awanen ta renebban ti bala? Kasanon ti taengda uray ikabilen a makasublida? Mangabaruananda manen a mangpatakder iti taeng a dida met nagayatan ket renebba ti gubat? Dida met nagbasolan ngem naipitda laeng iti giyera. Mairusok ngata ti gobyerno nga agtaeng dagitoy a biktima ti gubat iti sirok dagiti pisang-pisang a yero, abut-but a diding, narpuog a rangtay, ken sadino pay koma? Mabalin a kunaenyo: wen aya..sadino ti mabalinda a paglinongan kalpasan ti gubat? Umuna iti amin...awanandan iti trabaho ken negosyo. Awanandan iti pagtaengan. Kasanodan? Uray ibaga ti gobyerno a mayakarda wenno masuportarandada .... maipatakderanda ngata iti baro a pagtaengan? Ma-repair ngata dagiti narumek a taengda? Ken adu pay a saludsod. Ditay ammo no kasano ken kaanunto a masungbatan dagita a saludsod.
-o0oNakakaasi piman dagiti naipit iti gubat dita Marawi. Umuna iti amin, naatipa ti pannagna ti gobyerno local gapu iti riribuk. Nasudek wenno kunamon a narumek dagiti taeng ken negosyo dagiti residente nga apektado. Uray malpasen ti gubat, kasanoda? Saan a basta-basta makabangonda. Uray pay kunaen ti gobyernonasyonal nga ada tulong...kaano a maipakat? Inton natayen dagiti biktima? Pudno a babaen iti panangikagkagumaan dagiti maseknan...ininut a makapagad-adalen dagiti ubbing kadagiti naulimeken a disso ti Marawi ken kabangibangna. Ngem sadino? Kadagiti pirsapirsay a pagadalan? Kudos kadagiti mannursuro ken local nga opisyal iti gannuatda. Ngem kasta latta kadin? Mabalin a ti sumaruno nga addang ket ti pannakaipasdek kadagiti baro nga eskwelaan. Dagita ket paset laeng ti parikut a sanguen ti gobyerno-nasyonal iti masakbayan. Nasudek dagiti kalsada, rangtay, ken adu a pasilidad...natural laeng a maibangon manen dagitoy. Saan a mabalin nga iti uneg ti agpatnag ket marisut. Suma-total – adu pay a ling-et , rigat, ken sakripisyo ti maiyabaga sakbay iti pudpudno a baro a rupa ti Marawi.
-o0oNakakaasi ken piman met ti Marawi. No makasubli man dagiti residente..umuna iti amin, agsapulda no sadino ti orihinal a dappat ti taengda. Maikaddua, kasanon ti pagbiaganda. Maikatlo, mabalin nga agsapulda pay kadagiti naipatli ken mapukpukaw a kadaraanda. Ket dita, mabalin a maisa ti sakit ti nakem wenno mabalin met a sennaay nga awatenda laengen ti gasatda. Ngem iti likud ti amin, ti sakit ti nakem dinto mabalin a mapunas. Dita nga agrusing iti umno a panawen ti inda manen managsagana tapno subbotenda ti asping ti napukawda. Daytanto ti rumbeng a padaanan