Marawi…piman a tedda’t – gubat !!!!
PIMPIMAN a ladawan – pasdek ti negosyo ken residensia, nagbanag a rurog gapu iti gubat. Awan nakatakder a pasdek a limpio. Pasig a linnulussok ti bala ken pinirsa-pirsay ti bomba iti nasurok 149-days a Marawi siege. Nasuroken a sangaribu ti natay iti benneg dagiti terorista, sibilyan ken pwersamilitar/PNP. Iti kaudian a bilang…addan 162 ti soldado a nagbuwis ti biagda. Sabali pay ti bilang dagiti kameng ti PNP. Adu dagiti otoridad ti nasugatan nga iti agdama ket agpapaimbagda pay laeng. Ket kadakuada a natumba iti pagbabakalan…piman met dagiti naulilada. Nupay saan nga agbaybay-a ti gobyerno…dinto maikkat ti lamma daytoy a gubat uray manonton a henerasyon ti sumangbay ken lumabas. Adu ti imbungana a sugat, piglat, saem, saning-i ken sakit ti nakem. Ngem kangrunaan iti amin, mangibati daytoy iti adal ken kinapudno panggep iti di pagkikinnawatan a timon ti riribuk ken pannakapukaw ti respeto ken takder a panagmaymaysa koma iti babaen ti maymaysa a bandera ti Pilipinas. Kuna ngarud ni Pres. Duterte¨Ang pangako ko kay Allah…hindi na ito mauulit!”
-o0oMarawi Siege…dinton maulit pay! Nadagsen a kari ti impir-ak ni Pres. Duterte iti sango mismo dagiti soldado, pulis ken Maranao iti maikapito a bisitana iti Marawi City itay nabiit. Iti pakabuklan ti mensahena…insapatana kenni Allah a dinton maulit ti gubat sadiay Marawi iti sadino man a paset ti pagilian. Dinton maulit a mabaybay-an dagiti terorista wenno umili nga agurnong iti armas tapno aramatenda kontra gobyerno. “Huwag na natin itong ulitin kailanman. Sa panahon ko, hindi ako papayag,” impaganetgetna. Ammona a kasla namaysaan dagiti terorista ti gobyerno ta nakapag-urnongda pay iti armas ken bala ken aminen a ramit iti naplano a terorismo. Malagiptayo pay ti basnot idi ti presidente nga adda kano dagiti tattao (sibilyan ken pulitikos) ti nagbaybay-a ken timmulong pay kadagiti terorista. Nairaman iti banatna idi ti drug money a possible kano a naaramat tapno mapapigsa pay ti kapabilidad dagiti kalaban ti gobyerno. Dagita a banag ti puntirya itan ti Duterte Administration tapno dinton maulit pay ti Marawi siege.
-o0oNaasian ni Pres. Digong iti naimatanganna a ladawan kadagiti evacuees idi binisitana manen ida itay nabiit. Nariknana ti nadagsen a parikut para iti masakbayan dagitoy manipud iti agdama a panagururayda a makasubli iti kasisigud a panagbiagda. Ket kagiddan dayta a karirikna ti presidente, isu a mismo ti nangisa iti wagayway ti Pilipinas ken nangidaulo iti panagkanta iti “Lupang Hinirang”. Ditana metten nga indeklara ti “Liberasyon” ti Marawi manipud iti kuko dagiti terorista. Inna inabrasa ken sinaludduan dagiti kameng ti puwersa ti gobyerno nga agingga kadagitoy a panawen ket makirinrinnupak pay laeng kontra kadagiti sumagmamano laengen a natda a MauteISIS. Kinapudnona, indiayana pay ti pabor ti gobyerno kadagiti terorista a sumukoda laengen tapno mangabaruanan. Simmigunda met ti AFP: sumuko wenno matay!
-o0oNapigsansa ti kararag daydi lolok para iti diaya ni Digong nga isusuko koman dagiti terorista. Agasem…kalkalpas ti Marawi visit ti presidente…addan dagiti simmuko. Wen, talloda pay. Ngem sakbay ti isusukoda…napapatay pay nga immuna ti 12-a kaduada nupay nasugatan met dagiti sumagmamano a soldado iti dayta a ranget. Ala, intay man busisien ti imbunga ti kararag daydi lolok a saan a pimmasa a katipunero idi panawenna ta awan buneng ken kallugongna. Kutsilyo ken palos laeng ti armasna. Sige…subliantayo dagiti simmuko: kasinsin a mismo ti napapatay a lider ti ASG ken Emir iti ISIS iti Asya a ni Isnilon Hapilon ti simmuko ket intugotna pay ti dua a kaduana a bandido.