Gubat-marawi, nalpasen. ‘nia’t sumaruno?
AGSISIPOL dagiti salsaludsod manipud nagduduma a paset ti pagilian ken lubong no ania dagiti sumaganad nga eksena kalpasan a nagleppasen ti gubat-Marawi. Agrarapit kada agsasarumbinit dagiti suhestiyon, pasagid, pamkuatan ken pagdandanaganda kadagiti sumaganad nga eksena kalpasan ti gubat. No apay nga adda kumalkalbit a danag...ket ti kinapudno a nalawa ti Mindanao. Saan laeng a sadiay Marawi ti ayan dagiti terorista. Maidanagan, kunada, nga adda posibilidadna nga addanto manen grupo dagiti terorista ti mangdappat iti baro manen nga umukda tapno lumaban iti gobyerno. Adda posibilidadna para iti Marawi Part 2 no saan a maunaan. Maryusep, saan koman a mapasamak. Nakitatayon ti napasamak iti Marawi. Adu a tawen ken adu a pirak ti katukad ti maisayangkat a rehab wenno pannakaibangon ti tedda’t gubat a siyudad.
-o0oMailagip nga kadagiti tedda’t-ginggined (karamanen dita ti Baguio City ken kabangibangna), mano a tawen sakbay a nakabangon. Adu a rigat, sakripisyo ken kararag ti nagponduan dagiti agindeg ken agtuturay tapno bumangon manen ti siyudad. Ket iti panangigiya ti Apo, nakabangonen nupay dinto kalipatan dagiti nakaal-alingget a nagpasaranna. Kastanto met ngata ti Marawi City? Uray arigna’t narumek babaen iti gubat...dumtengto ti panawen nga agrusingto ti bukel-rehab a maitukit manipud kadagitoy a panawen. Maisanto manen dagita a pasdek ken buya para iti mas natibtibker a Marawi City nga awananen kadagiti nadamsak a terorista. Sapay koma ta di pasaren dagiti biktima ti gubatMarawi ti pinasar dagiti biktima ti nadamsak a bagyo a ni Yolanda. Agpapan kadagitoy a panawen, dida pay nakabangon gapu ta nagameran ti ibabangonda kadagiti anomalya. Agtitinnudoda pay laeng no sinno dagiti rumbeng nga agsungbat ken madusa kadagita nga anolamya-Yolanda. No koma ta limpio ti rehab nga impakatda, iti kapaut ti panawen a limmabas, nakabangonda [Yolanda victims) koma itan. Adu ti agkarkararag a sapay koma ta saan a pasaren dagiti Marawi victims ti kas sagsagrapen ita dagiti biktima ni Yolanda.
-o0oIti napalabas a gubat sangalubongan (immuna ken maikadua) .... adu a nasyon ti nasudek. Riwriw dagiti tao a natay. Adu a disso ti arig mapunas iti mapa gapu iti rungsot ti gubat. Maysa ditan ti maysa a paset ti Japan a bimmalsan ti Amerika kalpasan a sinudek ti Japan ti BaseMilitar ti US sadiay Hawaii. Mano a tawen ti intay pinalabas. Adda met dagiti simmaruno a gubgubat ngem saanen a sangalubongan. Ania itan ti estado ken kasasaad dagita a disso a tedda’t gubat? Saan aya a nain-inut a bimmangonda? Nagsublida iti kas kasisigud. Narang-ay ken natalingenngen manen ti sosyodad. Ti laeng idandanaganen iti agdama ket ti nasutil nga addang ti North Korea. Ket no saan kano a masebseban ti tensiyon a parparnuayen dayta a kinasutil ti Nokor...ania ngata ti mapasamak? Saan ngata a mabalinna a parnuayen ti World War III? Maryusep...saan met koman apo. No itinto pay bassit a Gubat-Marawi ket adun ti agkintayeg iti bungana...sirunto laket ngatan no Gubat-Sangalubonganen? Maria-kusina impusipos .... iti kina-high tech itan dagiti ramitpanggiyera dagiti nasyon ti lubong...amangan ta marunawen ti lubong a dina oras. Apo, isalakannakami. Iyadom a mapasamak dayta nga ukom iti biag ti pinarsuam. Amen.
-o0oSubliantayo ti agbalinto a rupa ti Marawi kalpasan ti nadara ken kaal-alingget a