Noynoy...nakasuan! sakuntip...nagtudo!
NAGTUDO ti sakuntip a binulonan ti aglalantip a saludsod. Kasano a napasamak iti likud ti reklamo dagiti naulila ti SAF 44 a napapatay iti Mamasapano incident idi Enero 2015. Insaklang idi dagiti naulila ti SAF 44 idiay Ombudsman ti kaso a Reckless Imprudence resulting in Homecide (multiple homicide kuna dagiti analysts)...kontra kenni sigud a Presidente Benigno “Noynoy” Aquino . Ngem saan a kinabig ti antigraft body ti darum gapu ta kurang kano iti natibker nga ebidensiya. Resulta: graft ken usurpation of authority ti ingkaso ti Ombudsman kontra kenni Pinoy. Kuna ti anti-graft body: “willfully, unlawfully and feloniously” ti panangpabor ni Pinoy kenni sigud a PNP Chief Alan Purisima (nakasuspende idi) tapno tumulong nga agplano para iti operasyon idiay Mamasapano.
Malagip pay nga idi Setyembre, imbasura ti Ombudsman ti mosyon ni Aquino a saan koma a mairaman daytoy iti kaso ket pinabasolna ni sigud a SAF Director Getulio Napenas. Saan kano a tinungpal ni Napenas ti bilinna (Aquino) a makipag-coordinate pay iti military. Naglibak pay ni Aquino a saanna kano nga imbilin iti military a mangted iti reinforcements gapu iti ceasefire iti MILF. Ngem ti anglitna...uray inraman ti Ombudsman ni Aquino iti kaso ti Mamasapano, graft ken usurpation laeng. No panggep iti isyu ti pannakapapatay kadagiti SAF 44...awan kasona. Ditan a bimmara ti adu a pidit-pidit dagiti umili nangruna kadagiti naulila.
-o0oSakbay a nagpa-Vietnam ni Pres. Duterte, nagamad ti media no ania ti makunana iti inyetnag ti Ombudsman a pangeddeng kontra Aquino. Ababa ngem nabatad ti saplit ni Digong. Indalanna laengen iti pangngarig. Kasano kano a di karaman iti kaso ti maysa nga opisyal a nangted pammalubos a maisayangkat ti Oplan Exudos a nakatayan ti SAF 44? Kasta met laeng ti panangarisit dagiti legal a luminaryo. Kuna ngarud ti maysa nga opisyal ti VACC: kasla inunaan ti graft body ti mabalin nga addangto ti Korte Suprema. A ti kayatna a sawen, kunada .... amangan ta ma-whitewash ti kaso a naipila kontra Pinoy. In short...lusot daytoy iti sungsungbatan iti napasamak a masaker. Tsk tsk...piman met dagiti biktima.
No koma ta makasublida ta isudan ti agsao iti pudno. Ngem kuna met dagiti tuod a manamati: napigpigsa ti karma no hustisya ti saritaan. Dinto makalusot iti linteg dagiti nagbasol kasano man kano iti pigsa ti kapetda iti agdama.
Malagipko pay ti nayebkas itay nabiit ni Pres. Digong panggep iti plano a pannakaisaklangna gapu iti napasamak sadiay Marawi.
Nabatad ti sungbatna: inakona ti napasamak sadiay Marawi ket nakasagana a sumango ken agsungbat iti resulta ti gubat. Ammona ti pagrebbenganna kas presidente a nangeddeng tapno maparmek laeng dagiti terorista. Saan a para kenkuana ti addangna no di ketdi para iti masakbayan ti Mindanao ken sibubukel a pagilian no terorismo ti saritaan. Ngem apay kano a saan a maako ni ExPres.
Pinoy ti sungsungbatanna a pagrebbengan kas nangted idi iti pammalubos iti pannakaisayangkat ti misyon idiay Mamasapano? Apay kano a kabutengna a sanguen ti kinapudno? Apay a kayatna nga ilisi ti bagina iti sango ti tanem dagiti SAF 44? Adu pay a sakuntip ken tabbaaw ti nagngegantayo manipud nagduduma a sector ngem bay-antayon a ti korte ti mangeddeng iti kasona. Kuna ngarud daydi lolok: kinatakrot ti itatallikud a sangwen ti