Australiana a madre…binangga ni Duterte!
SAKBAY nga intay lukaisan ken siripen ti baro manen a kontrobersiya….intay man pay agtamed kadagiti amin a nagipila iti kandidaturada para iti barangay ken SK election itay kallabes. Maymaysa ti panggepda: agsirbi iti pagilian. Kudos appomi. Sapay koma ta ipapusoyonto ti agsirbi saan laeng a kadagiti bimmutos no di ketdi para iti sapasap.
Di koma magameran iti dakes nga aramid ti sapataanyonto nga akem nangruna iti makademonyo a sulisog ti droga.
Sapay koma ta dinto mapurar iti sileng ti pirak ken agkakasamit a kari ken sapata dagiti patgentayo a botante. Suktantayo dagiti rinuker, sadot ken awanan panangisakit a nakatugaw nangruna kadagiti adda iti listaan ti PDEA a kappon ti illegal a droga. Good luck kadagiti kandidato kasta met kadagiti botante.
-o0oIntayon sublian ti nabara ken nagburek a kontrobersiya itay kallabes. Daytoy ket ti eksena iti nagbaetan da Pres. Duterte ken kadagiti gangannaet. Unaentayo a lagipen ti inaramid ti BI a nangbara iti iseserrek koma ditoy pagilian ni Deputy Secretary-General ti Party of European Socialists a ni Giacomo Filibeck.
Daytoy ket napengdan sadiay Cebu International Airport tapno tumabuno kano iti maysa nga aktibidad ti Akbayan sadiay Cebu. Daplis idi ni Presidential Spokesman Harry Roque: “Pupunta siya rito to participate sa isang political convention na ipinagbabawal ng batas. Mayroon tayong kapangyarihan na tanggihan ang mga dayuhan na pumasok sa ating teritoryo”. Babaen kadagiti legal a luminaryo…adda paglintegan ti pagilian panggep iti pannakaipawil kadagiti gangannaet a makibiang (mangamong wenno kontra) iti administrasyon wenno gobyerno. Daytoy ket linteg a riniing idi, kas kunada, ni sigud a DOJ Sec. Leila De Lima idi panawen ti rehime ni sigud a Presidente Noynoy. So, nalawag nga adda linabsing ni Filibeck isu a napawilan a sumrek ditoy pagilian.
-o0oIti sabali a benneg…iti napasamak a turnover ceremony iti liderato ti Armed Forces of the Philippines (AFP)…impeksa ni Pres. Duterte ti disgustona iti naidanon kenkuana a report panggep iti maysa nga Australian Missionary a ni Sister Patricia Fox, maysa a madre. Nakemkem manen ti sangi ni Digong iti dayta nga eksena idi yebkasna ti panangakona iti amin a responsibilidad iti pannakaaresto ti madre babaen iti BI wenno Bureau of Immigration. Maipalagip nga inaresto ti BI ti madre iti pagnanaedanna sadiay Quezon City itay nabiit base iti mission order a pinirmaan ni Immigration Commissioner Jaime Morente gapu kano iti kaaddana (Sis. Fox) kadagiti Kilos-Protesta dagiti militante ditoy pagilian. Pinasingkedan met ni Justice Sec. Menardo Guevarra ti inaramid ti BI gapu iti panaglabsingna iti immigration laws. Kinuna pay ni Guevarra nga awan pakainaigan iti religious advocacy ni Sister Fox ti pannakaarestona no di ketdi gapu iti panaglabsingna iti paglintegan ti pagilian. Mainayon pay iti damag a nawayawayaan met laeng ti madre kalpasan a maipakita ti abogadona ti valid missionary visa ken pasaporte ti Australian Missionary.
-o0oIntay bueltaen ti nagpingkipingki manen a saplit ti ngangaw ni Pres. Duterte. Nalawag ken nabatad ti kinunana: “I am the one who ordered the Bureau of Immigration to INVITE Australian nun sister Patricia Fox to be investigated for her DISORDERLY CONDUCT”. Nalawag pards ti nakuna ni Digong. Imbilinna iti BI nga imbitaranda ni Fox tapno maimbestigaran iti kano ket di maiparbeng nga ar-aramidenna ditoy pagilian…(disorderly conduct). Saanna