Teenage pregnancy, lutasin natin!
Ano nga ba ang teenage pregnancy? Ito ay hindi ginustong pagbubuntis ng isang babae sa kanyang pagdadalaga. Hindi maipagkakaila sa ating kaalaman na parami nang parami ang kaso ng teenage pregnancy lalo na sa mga bansang mahihirap tulad ng Pilipinas.
Base sa datos ng United Nations Population, kung ikukumpara sa mga bansa sa TimogSilangang Asya, ang Pilipinas ang may pinakamataas na bilang ng teenage pregnancy at ayon sa Population Commission (Pop Com), nangunguna ang Cordillera sa rehiyon na may pinakamaraming bilang ng teenage pregnancy. Lumalabas na ang siyudad ng Baguio ang pumapangatlo sa may pinakamataas na kaso ng teenage pregnancy sa Cordillera. Ipinakikita nito ang maagang pagkahumaling ng kabataan sa agarang pakikipagrelasyon at maagang pagbubuntis.
Ano ba ang mga dahilan sa likod ng maagang pagbubuntis? Isa sa malaking isyu sa likod ng mataas na kaso ng teenage pregnancy ay ang kawalan ng tamang kaalaman sa sex education. Ang mga kabataang hindi naturuan ng tama tungkol sa pakikipagtalik ay may malaking posibilidad na maging biktima ng hindi ginustong pagbubuntis. Lumalabas din na ang mga kabataan ay kadalasang nakadarama ng peer pressure. Naiimpluwensyahan sila ng kanilang mga kaibigan na hindi pa lubos na naiintindihan ang kaakibat na mga resulta ng ganitong mga gawain. Akala nila ay pinagmumukha sila nitong cool at naaayon sa uso. Ang maagang pagkahumaling ng mga kabataan sa ‘gimik’ na kahit wala pa sa wastong edad ay isa rin dahilan ng teenage pregnancy. Naglipana ang iba’tibang bar o gimikan na dinarayo ng mga ‘millenials’’ na naghahanap ng lubos na kasiyahan. Hindi maikakailang maraming mga menor de edad ang nakakalusot at nakakapasok sa bar lalo na at hindi naman mahigpit ang seguridad at inspeksyon ng mga bar na ito. Ang pag-inom ng alak ay nagpapahina ng kakayahan ng kabataan na kontrolin ang bugso ng kanilang mga damdamin na siyang dahilan sa 75% na mga kaso ng teenage pregnancy.
Ang kawalan rin ng tamang gabay ng mga magulang maging ang impluwenisya ng social media ay nakahihikayat sa mga kabataan na subukan ang ganitong uri ng gawain. Huwag hintaying umabot sa puntong ang magagawa na lang natin ay magsisi.
Sa paaralan palawigin natin ang kaalaman ng mga magaaral sa sex education. Ang pagkakaroon ng awareness programs tungkol sa sex education at kung paano mahahawakan ang adolescent period nang mabuti ay makakatulong ng malaki para matigil ang pagkakaroon ng maagang pagbubuntis at ang pagsuong ng kabataan sa pre-marital sex. Bagamat ang gabay ng mga magulang ay kailangan, dapat ding sangkot ang pamahalaan sa pagsuporta ng pagpapababa ng teenage pregnancy rate sa bansa.
Ang usaping teenage pregnancy ay napakalaki at seryosong usapin na kailangan nating imulat sa mga kabataan.
Ang isang maliit na desisyon ay makapagbabago ng tuluyan sa iyong buhay!