Trillanes di na kano kabuteng ni Duterte!
Maryusep impusipos a nabistra! Dimmegdegen ti uram! Bimtak san apo ti nabayagen a naul-ullom a sakit ti nakem. Naungpot san apo ti desdes nga inda tinalunton manipud pay idi panawen ti eleksiyon. No malagipyo, nagsinsinniputen dagiti dua (Digong ken Trillanes) idi pay laeng panagkakampanya. Maulit manen ti pangta idi ni Trillanes nga uray mangabak ni Digong kas presidente, dinanto kano patugawen.
Nia’t napasamak? Uray nagtugaw ni Digong idiay Malakanyang…simmursurot latta dagiti basnot ken bir-it ni Trillanes. Agkakasakit a sao ken umsi ti nagraira iti nagbaetan dagiti dua. No koma ta toro dagitoy…nabayagdan nga agsangsangdo. Ngem kasla nabannog san dagiti sarada ta kellaat a nangeddeng ni Pres. Duterte a maibasura ti naited kenni Trillanes nga amnestiya a sinaruno ti bilin a maareston ti senador. Kasla bimtak a kimat ken gimluong a gurruod ti eksena iti kaadda ni Pres. Duterte iti ballasiw taaw (Israel/Jordan).
***
Iti ibebettak ti kadagsenan a kontrobersiya iti agdama…apagapaman a nagaburan ti isyu iti bagas, galunggong, ngimmato nga inflation rate gapu iti timmayok a presyo dagiti gagatangen, panagalsa dagiti mannursuro nga agkidkiddaw iti kanayonan a sueldo ken adu pay a parikut. Gapu iti daytoy baro a kontrobersiya panggep iti amnestiya ni Trillanes a binawi ni Digong…nangibunga daytoy iti agsasamusam kaskada aglulusdoy a kapanunotan ken reaksiyon dagiti umili.
Ti kapaitan kadagiti reaksiyon ket nagtaud a mismo iti ngangaw ni Sen. Trillanes. Saanna kano a kabuteng ni Pres. Duterte. Binansaganna ngarud ti presidente a TAKROT ta inranana kano ti nagaramid iti addang kontra Trillanes bayat nga adda daytoy (Digong) idiay Israel. Awan pay nasalawtayo a reaksiyon wenno sungbat ni Digong iti dayta a komento ti senador.
Sabagay, kunada…idi pay laeng ket madlawen a kasla awan amak ti senador no agsasao kontra iti presidente. Kinapudnona, adu ti agkunkuna a “bastos” kano ti dila ken aktuwasyon ti senador no bumanbanat kenni Digong. Kasla awan ti respetonan iti maysa a presidente. Kuna met dagiti adda iti masa: sayang kano ti talek nga intedda iti senador iti tayyek ti utekna. Imbes nga agsirbi koma kadagiti nagtalek ken bimmutos kenkuana…saan ta ti met la agsirsirip kano iti kammali ti presidente tapno mabasnotanna.
Adda pay arasaas: ania aya ti talaga puntirya ni Trillanes? Ti agbalin a prisedente? Sus maryusep…kasla naallingagko ti ikkis daydi lolok, pards. Kasla yik-ikkisna: no itanto pay a senador laeng ket arig kukuanan ti Pilipinas no agsasao…sirunto ket ngatan no agbalin a presidente? Dinatayto amammon ta ringgor ken apanto laengen ti sapsapulenna, saan ngata?
Hehe…relax lang lolo…Sayang ta dika idi timmapog iti pulitika. Ni met lolak ti tinapogam idiay karayan idi madama ti digusna. Resulta: immadu ti pulitayo.
***
Addan pammilin ni Pres. Duterte iti PNP ken AFP a rumbeng nga arestarendan ni Sen. Trillanes kalpasan nga impaulogna ti Proclamation No. 572 a nangwaswas iti amnestiya a naited iti senador idi panawen ni Ex-Pres. Noynoy Aquino. Nadagsen ngamin dagiti panagalsa a nakairamanan ni Trillanes idi panawen met ni Ex-Pres. GMA a house speaker itan. Mailagip a karaman daytoy idi napasamak to Oakwood Mutiny idi Hulyo 2003; Marines Stand-Off idi Pebrero 2006, ken Manila Peninsula Siege idi Nobyembre 2007.
Ginandatda idi a pababaen iti takem ni GMA ngem dida nagballigi. Naarestoda ken nakasuan dagitoy ngem nayawatanda iti amnestiya iti administrasyon ni Noynoy. Ket gapu iti pannakaduptal kadagiti panaglabsing iti pannakaipaay iti amnestiya…nangeddeng ti