Pulis…saluduam kadi wenno ania?
NAPAIT a makasugkar. Dagita a balikas ti kanayon a matimudtayo idi kadagiti tuodtayo nangruna no panggep iti ayat. Napait langaruden, makasugkar pay laeng. Kas ngay tay naltutanka nga awan pay sangakutsara a danum a pangiduron wenno pangibulonmo. Arigna tay nasam-it a samiweng nga iti katengngaanna ket kellaat a nababriit a simmilang.
Kunada ngarud: kontrolado kuntodo sintunado de purnada. Iti narabrabaw pay a pangngarig: nasam-it idi ngem in-inut nga immalsem.
Dagita a saplit ti intayman yarisit kadagiti agkakabangsit a paspasamak iti kagimongan iti agdama. Buyogandakami:
***
Itay laeng nabiit, adu dagiti agkakadagsen a kontrobersiya a nabukitkit kadagiti nagduduma nga ahensiya ti gobyerno. Ania ti simmaruno a pagteng? Natural, adda imbestigasyon. Agtitinnudodan, kabsat. Agpipinnabasoldan. Awanen ti nakapsut. Nalalaingda aminen. Dimmanon payen ti tatsaranda iti paraangan ti Senado ken Lower House.
Imbes a ti koma tamingen dagiti mammanday-linteg ket agpanday iti linteg wenno agkorehar kadagiti agdama a paglintegan…ngem saan pards ta nagbalindan nga imbestigador ken hues.
Kunada…maikaniwas iti akemda ngem gapu ta kasapulan (kano) tapno makaputarta kadagiti baro ken nainpanawenan a linteg…isu a dayta ti baro nga eksenada iti agdama. Ngem kuna met dagiti mannirip: mayat tapno maibutaktak ken makalkal amin dagiti nakalemmeng a rugit ken angpep iti kagimongan nangruna kadagiti adda iti gobyerno a sanggir dagiti taxpayers. Ngem adda met simmupla: wen a ngem no dadduma masobraandan sa met ti agimbestigar. Ta kasla agbalin metten a sentensiado ti imbitaranda a pagamadan laeng koma.
Agparparangen a guilty wenno nagbasolen ti pobre a nakasaang iti Senate ken House hearings. Adda pay ketdi nagkuna (nangruna kano ita a panawen ti eleksiyon) nga adda kanon dagiti agpagpaguapo nga agimbistigar ta ammoda nga addada iti sango ti kamera ket adu a botante ti siimatang.
Uray kano dagitay awan met kaes-eskan dagiti amadenda, ipir-akda latta tapno makuna kano a nasariritda. Ngem kudag met dagiti naulimek a pudno a nasaririt ken addaan linaon ti utekda: “talnakay man dita, buisitkayo!”.
*** Ti nakasaksakit a kontrobersiya ket ti isyu kenni Sen. Trillanes. Saan a simmarsardeng a nangbasbasnot kadagiti nasiripna a pagkapsutan ti Duterte administration.
Ti anglemna, sumanao pay laeng kano uray no aggigiddanen dagiti kaskasona kas koma iti kudeta, rebelyon ken insiting to sedition. Kumanutak latta. Kugtar met dagiti analista: imposible nga awan dagiti tao wenno grupo nga adda iti likudna tapno agtultuloy ti addangda a mangpa-distugaw kenni Digong.
Imposible kano nga agsulsulo laeng ni Trillanes. Amangan ta maar-aramat laeng daytoy wenno paar-aramat laeng. Gimmiddan pay dagiti parikut ti pagilian kas koma iti nangato a presyo dagiti gagatangen, panagkurang ti bagas, parikut iti transportasyon, parikut iti petroleum products, isyu ti turismo (Boracay) ken dagiti nagsasaruno a kalamedad iti nadumaduma a paset ti pagilian. Sa ita, adda ditan ti sungaban ti election period. Kas gagangay, parikut manen iti seguridad ta sumingit-singit manen dagiti krimen a dagiti kandidato ti mabikbiktima.
Sumilsilod met ti kasasaad ti salun-at ni Pres. Duterte nga adun ti agpipiesta tapno ipapatida iti sosyodad nga addaan daytoy iti nadagsen a