Bagyo manen ditay pay nakaungar!
TSK tsk…nia metten a malas ti intay sagsagrapen iti agdama. Agasem…ditay pay laeng nakaungar gapu iti basnot ti bagyo a ni Ompong, kimmugtar manen ti delubyo ni Bagyo a Rosita. Ti imasna, ti nagnaan ni Ompong ti sinurot ni Rosita.
Natural, piman manen dagiti taga-Norte a sinaplitna. Mangrugrugi pay laeng nga agungar dagiti naimula a kas sukat dagiti sinudek ni Ompong…kinaradikad manen ni Rosita. Ania metten a kinamalastayo, pards.
Ala, pagyamantayo laengen ta sinaluadannatayo ni Apo ta sibibiagtayo. Ti piman ket dagiti biag a naipatli. Awan ngamin labantayo no saad ti panawen ti bumasnot. Kunada: saan ngata a pannubok dagita a kalamedad iti kired wenno tibker ti Pilipinas? Intay man paludipan daytoy a tema:
***
Itay laeng nabiit…kalpasan a bimmasnot ni bagyo nga Ompong ditoy Norte wenno Amianan a Luzon…intay naimatangan no kasano nga in-inut a bimmangon dagiti biktimana.
Adu dagiti naawanan iti pagtaengan nga agpapan ita ket addada pay laeng kadagiti evacuation centers, kas koma iti napasamak ditoy Cordillera nangruna iti ili ti Itogon. Adu ti nagbuis a biag nga agingga iti agdama, adda pay dagiti inda birbiroken. Adu ti arig panawan ti maudi a namnama a makitada pay dagiti nagpukaw nga ingungotenda. Adu met ti inawatdan dayta a signos ti biagda. Ti nakas-ang adu ti naapektaran iti panagadal dagiti ages-eskuwela. Mabalin nga adda payen dagiti naupay ket didan kayat ti agsubli kadagiti pagadalan. Tumulongda laengen iti ibabangon ti pamilyada nangruna kadagiti naulila.
Sabagay, saan laeng a gobierno ti mangibakbaklay iti ibabangon. Adu manipud pribado a sekta ti agtitinnulong iti agdama para kadagiti biktima ni Ompong. Adu pay timmulong manipud ballasiw-taaw. Kudos kadakayo amin appomi.
***
Iti agdama, narigat nga iladawan ti karirikna a napnuan danag gapu iti basnot ni bagyo a Rosita. Binasnotanna manen dagiti disso a sinudek idi ni Ompong.
Nupay nasapa a nagtignay dagiti LGUs ken maseknan nga ahensiya ti gobierno, gapu iti leksiyontayo kenni Ompong…ditay maikkat ti amak iti biang dagiti nakalamedad. Ti nakasang ket kadagiti biniktima idi ni Ompong sa man ninayonanen ni Rosita ti pannakasaplitda. Pudno a nakas-ang.
Narigat ti bumangon…ngem iti tulong ti gobierno ken pribado a sector…maisanto met laeng ti namnama. Kunada ngarud…”iti likud ti kasipngetan, adda lawag a sumiray”.
Ti ditay masungbatan ket ti saludsod nga: iti kinaadu dagiti mabalin a pagnaan dagiti didigra…apay a ditoy pay Pilipinas? Adda kadi dagiti malas nga aramid no apay a kasla maibuybuyat kadatayo dagita a nagdadagsen a parikut?
***
No intay timuden ti dinniskutiran kadagiti pagsasabatan ti umili a disso….adu ti mapidottayo nga adal. Mabalin a mapaisemka gapu kadagiti makasutil a pangarig, ngem mabalin met a mahigh-bloodka kadagiti kasla umasideg iti kinapudno a pangangarig dagiti analysts.
Adda pay dagiti pangngarig nga inda idildilig dagiti pannubok ti panawen kadagiti paspasamak iti kagimongan iti agdama. Insidir dagiti dadduma ti parikut iti bagas nga di awan pay ti baro a pagannurotan nga impaulog ti gobierno….agsisipol kada agsisimparat ti nagan dagiti bagas a gatgatangentayo.
Ti ket nagadu a nagan. Mariro dagiti consumer no ania ti gatangenda. Ita, babaen iti baro a paglintegan, mano laengen ti natda a pagpilian. Apay ngamin a napasamak ti sigud a kontrobersiya a nakaad-adu ti nagan ti bagas ngem iti bilang dagiti maimulmula a pagay?