Pulis, arestado gapu iti kaso a rape!
SINALBAG a biag! Pimpiman ti PNP a mangdaldalus iti ranggoda kontra kadagiti etta…adda latta met dagitay riper a mangmumulit iti dayawda.
Siguro no di manen makapagteppel iti pungtotna ni Pres. Duterte…amangan ta addan mabitayna a dina oras. Siguro...apaman a makainana ti presidente manipud iti bannogna iti no mano nga aldaw a kaaddana iti Asean Summit idiay Singapore…ditanan nga ituno, igisa, ipreto, tadtaden ti baro nga isyu kontra kapulisan.
Tsk tsk…amangan ta lumitem manen ti pispisna sa mangurat nga agtabbaaw. Ngem ala…sakbay man nga intay sungrodan ti bumegbeggang a kontrobersiya kontra kadagiti etta ti kapulisan….intay man pasadaan pay dagiti sumagmamano nga isyu iti naglabas nga aldaw:
***
Iti pannakaisursurat daytoy a benneg…matagtagiuray pay laeng ti iruar ti korte a warrant of arrest kontra sigud a First Lady Imelda Marcos. Seven counts iti kaso a graft ti impasungalngal ti korte a mabalin a pagbaludan ti nagbasol iti manipud ennem agingga’t sangapulo ket maysa a tawen.
Kuna met ti PNP…nakasaganan ti detention center a pakaipisokanna. Ngem iti likudan ti amin, adda metten kiddaw ti kampo ni Imelda a mosyon manipud nangatngato a pangukuman. Kunada…kas pangarigan ta addanton mandamiento de aresto…mabalinna ti agpiansa. Mailawlawag a ti sigud a First Lady ket guilty (sentensiado) iti pammabasol a saan laeng a maysa nga akusado.
Ti laeng nakaskasdaaw kuna ti kaadduan nangruna iti benneg dagiti biktima ti Martial Law….apay nga ita laeng a napasingkedan ti pammabasol kontra kenni Imelda kalpasan iti nasurok tallupulo a tawen. Adu ti naragsakan, adu met dagiti naassian. Adda pay nagkuna – a saan koman a maibalud gapu iti edadna. Makitanto no sadino ken no anianto ti pagtungpalan ti gasat ti sentensiado.
***
Idi napalabas a bulan ti Octubre…napapatay iti maysa nga ambush daydi Mayor Alexander Buquing ti Sudipen, La Union. Mabalin kano a nagameran iti pultika ti pammapatay. Itay nabiit, maysa manen nga ambush ti napasamak iti probinsiya ti La Union.
Daytoy ket sadiay Balaoan, La Union a ti naambush ket dagiti agama a Mayor ken Bise Mayor ken kakaduada. Natay dita ti bise mayor a ni Afred Concepcion ken escortna a ni Mike Ulep idinto ta adda pay dagiti nasugatan. Agpada a reelectionists dagiti agama para iti 2019 midterm election.
Kuna dagiti imbestigador a nagameran manen daytoy a krimen iti pulitika gapu ta napasamak ti pammapatay iti 8:20 iti agsapa iti Balaoan-Luna Provincial road bayat nga agturong dagiti agama iti munisipyo ti ili. Binilinen ni PNP Chief Gen. Oscar Albayalde ni PNP Regional Director Romulo Sapitula para iti napartak ken naan-anay nga imbestigasyon iti nasao a krimen.
Tsk tsk…makapadanag, pards dagiti mapaspasamak. Adayo pay ti eleksiyon…sapay koma ta din manayonan dagiti biktima ti pammapatay gapu laeng iti pulitika.
***
Basura manipud South Korea a nailugan iti nasurok limapulo a crates…nabuko sadiay Misamis Oriental. Ti shipment ket pang-recycle kano a materyales ngem idi masukimat, basura gayam dagitoy.
Nabigbigen dagiti otoridad ti consignee ket maisagsaganan ti reklamo kontra iti daytoy kas posisyon ti DENR. Rumbeng kano a maisubli idiay South Korea dagiti crates ti basura ken mapagnakem dagiti adda iti likudan ti illegal nga aramid. Mailagip nga adda met dagiti basura ti Canada idi ti naduptalan dagiti otoridad. Naaksiyunanen daytoy.
Ngem ti bangsitna, simmublat met ti South Ko-