BuCor… Garapal kanon ti korapsiyon!
ITI pannakaisursurat daytoy nga espasyo ti Karit (Sept. 12), manarimaanen ti pannakaitultuloy ti Senate hearing panggep iti GCTA babaen iti Senate Blue Ribbon Committee nga idauluan ni Sen. Richard Gordon. Kas pagaammon ti amin… rimkuas ti kontrobersiya sipud naibutaktak ti gistayen pannakawayawaya ni sigud a Mayor ti Calauan, Laguna a ni Antonio Sanchez.
Ditan a nangrugi ti nagsasaruno nga imbestigasyon. Dita metten a naibutaktak ti adu gayam a kalokuan a mapaspasamak iti uneg ti nakuna a pagbaludan. Ngem sakbay nga intay saggaysaen dagita a bungtot a nasukay dagiti imbestigador… intay man pay pasadaan dagiti sumangka-kontrobersiya met a paspasamak iti n apalabas:
***
Babaen iti Manila RTC Branch 32… impaulog ni Judge Thelma Bunyi-Medina ti Warrant of Arrest idi Agosto 29, 2019 nga awan nairekomenda a piyansa para iti 15 counts ti murder kontra kenni CPP-NPA founder Jose Maria Sison ken 37 a kakaduana gapu iti Inopacan, Leyte massacre kalpasan a madiskubre ti otoridad ti maysa a killing fields ti NPA rebels a nakakalianda kadagiti rurog dagiti napapatay a biktima. Gapu iti addang ti korte… nagtignay a sigida ti PNP babaen iti inlatagda nga “red notice” iti International Police Crime Organizations. Ti “red notice” ket nairanta tapno maalerto dagiti amin a police forces ti sangalubongan a wanted ti maysa a tao iti maysa a pagilian a mabalin nga aglemlemmeng iti teritoryoda. Kuna ngarud ni PNP Chief Police General Oscar Albayalde a babaen iti impilada a “red notice” mabilbilangen kano ti aldaw ni Joma Sison sadiay Netherlands.
Maipalagip a ni Sison ket agdama a naka-self exile sadiay Netherlands mainaig iti “political asylum” nga inyetnag ti Dutch Government idinto ta dagiti dadduma nga opisyales ti CPP-NPANDF ket posible nga aglemlemmeng iti nadumaduma a pagpagilian.
Innayon ni Albayalde a kiddawenda ti tulong ti Dutch Embassy ditoy Pilipinas kasta met ti Interpol tapno ma-proseson iti mabiit ti pannakaibabawi
ti asylum kontra Sison.
Saludsod: daytoy ngatan ti panipudan iti matagtagiuray a panaggibusen ti insurhensiya ditoy pagilian? Sapay koma…
*** Gapu laeng iti isyu ti trapik iti Metro Manila partikular iti Edsa… nagresulta daytoy iti pamkuatan a maikkan koma ni Pres. Duterte iti “emergency power” tapno mas naparpartak a maresolba ti parikut. Ngem ti imasna, bimmara ti singasing ni DoTR Sec. Arthur Tugade idi maangay ti maysa a taripnong sadiay Senado. Kinontra daytoy ni Sen. Grace Poe. Naipasagid ti senadora a saan kano nga “emergency power” ti makasolbar iti parikut ti trapiko dita Metro Manila no di ketdi adu dagiti pamkuatan. Impasagid met ni Tugade a gapu kano iti grabe a trapik, adda dagiti biktima a maitartaray kadagiti pagagasan ti matmatay iti kalsada.
Adda met solusyon ti MMDA ken PNP a maeskortan dagiti emergency patients tapno saan a mataktak ti pannakaidanonda kadagiti ospital. Gapu iti ipupudot ti kapanunotan dagiti maseknan nga opisyales ti komite ti transportasyon ken gobyerno…kinuna ni Presidential Spokesman Salvador Panelo a dinto kano sumuko wenno agparintumeng ni Presidente Duterte iti Kongreso tapno mapaboran iti “emergency power.”
Tsk tsk, pinnatangkenanen ti situasyon, pards. Kongreso kontra Presidente itan ti eksena. Saan aya a kasla adda payen pasagid ni Digong a kasla nauman daytoy iti isyu ti trapiko dita Edsa…nga amangan ta saanen a masolusyonan daytoy. Ngem guray, no sibibiag daydi lolok, siento porsiyento nga amadenna met kenni Pres. Duterte panggep iti nakunana idi nga agingga iti umay
a Disyembre… lima a minutos laengen a tarayen ti lugan ti nagbaetan ti Buendia ken Makati.
Sayang lolong ta awan pay dagiti sub-ways idi panawenyo. De-uging a train laeng idi, saan aya? Maysa pay, abbaba dagiti lugan idi panawenyo saan a kas ita a pinnaatiddoganen.
***
Nagbalin met a kontrobersiya itay nabiit ti isyu ti SOGIE (Sexual Orientation, Gender Identity, and Gender Expression) gapu ta addan singasing wenno bill idiay Kongreso. Adda idin inrakurak ni Presidente Duterte nga i-certifyna ti nakuna a bill a kas “urgent” gapu ta kayatna a matulongan ti pakabuklan ti LGBTQ+.
Ngem kuna met ni presidential spokesman Salvador Panelo a mabalin a saan a ti SOGIE Bill ti puntirya ni Pres. Duterte iti pangeddengna. Kinuna pay ni Panelo a no adda man sertipikaran ni Pres. Digong ket ti Anti-Discriminatory Bill agsipud ta daytoy ket para iti amin saan laeng a para iti LGBTQ… sabagay, ibaklayen ti nakuna a bill ti sakup ti SOGIE Bill.
“Hindi, ang sinasabi ng Presidente iyong isicertify niya most likely, hindi yong SOGIE Bill, kung hindi ang anti-discrimination bill. Kailangan kasi hindi puwedeng isang class lang ng tao ang gagawan mo ng subject ng isang batas, otherwise magiging class legislation yon. Lahat ng discrimination laban sa kanino mang tao, sa class or person, iyon ang ayaw niya.”
Maipalagip manen a saan a kontra ni Pres. Digong iti panagnayon kadagiti agdama a C.R. Saan laengen a para lallaki ken babbae no di ketdi mayanonan kano iti para-toboy ken parabakla. Kinapudnona… sakbay a pimmutok daytoy nga isyu… adda maysa a farm destination for tourists idiay Palawan ti simmikat gapu iti konseptoda iti gender sensitivity no C.R ti saritaan. Sadiay, addan uppat a klase ti C.R-da. Daytoy ket para Boys, Girls, Tomboy ken Bakla. Babaen kenni designer Benjie Monegasque, addaan daytoy iti adbokasya para iti equality wenno panagpapada ti amin a rumbeng nga awaten ken respetuen ti amin a klase ti gender stripes.
Mayat amin dagita a singasing, pards. Ngem adda nagpasagid….kasano ngay kano dagiti “pandek” wenno “unano”? Mabalinda met ngata ti agkiddaw iti bukodda a CR tapno magawatda kano ti pagisbuan?
***
Ala, intay sublianen ti tematayo, pards. Addan dagiti naisaang a witness iti agtultuloy nga imbestigasyon ti Senate Blue Ribbon committee...banag a nagibutaktak kadagiti kalokuan a mapaspasamak idiay Bilibid wenno BuCor. Pinaneknekanda a grabe ti korapsiyon dita. Adu gayam ti pagkuarkuartaan dagiti empleados wenno opisyal ti BuCor. Adda dita ti mabayadan a pannakaipastrek dagiti ramit wenno gadgets, arak, makan, agraman “tilapia” – babae. Malaksid iti kubol a naed dagiti VIPs a balud a kabaelanda ti agbayad, adda pay naibutaktak a hospital pass nga ar-aramaten kano dagiti aginsasakit ngem sadiayda gayam nga agnegnegosyo nga illegal. Ultimo Conjugal visit…adda gayam bayadna.
Adda kano pay sugalan ngem nagbalin a bulag, tuleng ken awanan dila dagiti maseknan nga empleados ti BuCor kasukat ti dakkel a kantedad. Amin dagita ket imbutaktak dagiti nagwitness. Kimmaron ti tensiyon panggep iti GCTA for sale. gapu iti sileng ti pirak…adun dagiti nawayawayaan. Kinapudnona, adu metten dagiti simmuko a kas pammilin ni Pres. Duterte ngem adadu pay dagiti masapsapul ken maur-uray. Adda pay reports nga adda dagiti nawayawayaan a balud nga addan iti ballasiw-taaw.
Tsk tsk…pudno a grabe pay ti kinadagsen dagiti parikut panggep iti mapaspasamak dita BuCor a rumbeng laeng a sukayen ken solusyonan tapno madusa dagiti nagbasol. Adda kanon 30 nga empleadosda ti nasuspende iti ennem a bulan. Nadadagsen kano dagiti kaso a sanguenda agraman kadagiti sigud a nagtrabaho dita. Maryusep…saan laeng gayam a dagiti nakabalud dita ti rumbeng a makorektar wenno mapagbalbaliw, kunada.
Ultimo gayam dagiti empleados ti BuCor ket rumbeng a maibalud ken mareporma, ikkis ti umili! Imbag laketdin ta nasukay ti GCTA law ta no saan, nakarkaron a korapsiyon ti agari dita BuCor. Appomi a mangiturturong iti desdes ti puli ni Juan dela Cruz…adda talekmi kadakayo para iti mas natibtibker a masakbayan.
Dios ti mangatibay kadakayo. Adios mi amor, ciao, mabalos.