Covid-19 wenno ‘Kupit-22’?
SINALBAG a sinal-it! Agkakawilen dagiti parikut ti lubong. Natural, no lubong kunam, karaman ti Pilipinas ta addatayo iti Earth, malaksid no umakartayo idiay Neptune. Ngem guray, pards… siguradoka kadi nga awan Kupit, este Covid-19 idiay Neptune? Mabalin kano nga adda no addan nagdappat a Pilipino sadiay. Tsk tsk… susmaryusep a babassit ken higante… anak ti kuton ken kanit… pudno a dakkel a parikut ti sangsanguen ita ti sangalubongan gapu kenni Kupit, este Covid-19.
Agasem ket iti pannakaisursurat daytoy a panid… addan 636 ti nagpositibo, 38 ti pimmusay ken 26 ti nagimbag. Ditoy Pilipinas pay laeng dayta, pards. No sadiay ballasiw-taaw, inullayanen ti Italya ti bilang dagiti pimmusay sadiay China a naggappuan ti anak tis al-it a sakit. Simmaruno ditan ti Espanya ken Pransiya ken adu pay a nasyon. Dayta ti gapuna no apay a nagbalinen a pandemic, kuna ti World Health Organization.
Mariosep! Ngem ala, sakbay nga intay manguros iti pangato ken pababa… intay man pay pirit-piriten dagiti kaarngina a parikut gapu kenni ni Kupit, este Covid:
***
Itay laeng kallabes, marikna ken maibuksilam, pards, ti kaibatogan dagiti nagkurenren a piligis iti muging ken pingping ni Pres. Duterte. Pudno a mariknana piman ti saem ken kuddot dagiti parikut a sangsanguenna iti agdama gapu laeng iti daytoy a sakit a pinaktorya ti Wuhan, China. Sanabale, kuna ti kaadduan ta adayo nga ad-adu ti nabiktima ni Covid sadiay no ikumparatayo ditoy Pilipinas.
Kuna met dagiti sutil: Gunggunada, ah! Maryusep! Ditay koma agpabasol ken sumidir, kabsat, ta ditay pay ammo no sadino ken kasano a timmaud daytoy buisit a sakit. Ngem no agsukimattayo a naimbag, adda punto dagiti managraman iti agkakanat a karne ken makan a kasla naggapu kano ti sakit iti ti la adda a kankanen ken sidsidaenda kano idiay China. Awan sa kanon ti nabiag iti rabaw ti daga a dida indasar a makan. No koma labsen iti agsasao, kuna dagiti ababa ti sentronna—kabukabda ngamin. Idiay sulinek ti Ilokos, kunada dita ket Turkab ken Rawet.
Tsk tsk… dayta ita ti naganabtayo—Covid-19. Ti adal dita: Dikay lamot a lamot amangan ta masilodnakayo ti baro a sakit. Kuna met dagiti managbisin: Naimimbag kano tay matay iti bussog ngem iti bisin. Isu ah!
***
Ala, subliantayo man da Covid-19 ken “Kupit-19.” Ngamin idi simngaw ditoy lubong ti anak ti dugang a Covid-19… adu ti kasla nagsennaay laeng iti apagbiit. Bassit la kano daytoy a parikut ta ngamin, no idilig kadagiti dadduma a nasyon, ti Pilipinas ti kabassitan iti bilang dagiti nagpositibo ken pimmusay kadagita a tiempo. Ngem idi medyo immadun ti nadalapus, kasla naarikattot nga ipes a napugsitan iti samal dagiti Pinoy. Ti la adda ditan a binnakalan iti panirigan ken nagruar dagiti agkalalaing (kano) a pamkuatan ken ammo dagiti pasurot ni Lapu-lapu ken Magellan.
Ditan na nagruar dagiti galad a kasla datayon ti kalaingan. Ultimo ngarud nagduduma a prutas ket trinatodan (saan nga amin) a kasla Dios a kabaelanna ti mangbiag iti natay. Tay ngarud saba ket naibus kadagiti paggatangan ta kunada a makaagas kano.
Tsk tsk… manamati ngamin ni Pinoy, pards, isu a kasta. No kunada a makaagas ti lugit ti manok, ayna, kabsat… talaga a kanenda, pwe!
No adda la ngata mangibaga nga agas ti Covid ti ipes, maibus dagiti annak ti demonyo nga ipes iti uray sadino a sipi ken rengngat nga ayanda. Imbag laketdin ta adu pay dagiti natda iti pulitayo ti nasasaririt ta naikuspil dagiti awan kaes-eskanna a kannawidan ken pammati idi