KARIT KEN KAYETKET
ugma. Resutla, naammunatayo iti kinapudno nga awan gayam ti sansantuen ti nakuna a sakit. Ta iti kaudian a damag, ultimo a dagiti nasasaririt ken mabigbigbig nga opisyales ti kagimongan ken gobyerno ket pinadso ni Covid19 kas koma kada Sen. Zubiri, Senador Koko Pimentel, Christopher de Leon (immimbag), Prince Charles ken sumagmamano a sikat a players ti NBA ken adu pay a persona ditoy lubong. Pudno nga awan sansantuen daytoy a virus, kabsat. Ti laeng matagtagiuray ket no adda matamaan a nuang nga awanan katugangan.
***
Ngem kasano kano a simrek iti eksena ti Kupit-22 a kasla kaarngi kano ti Covid-19? Adu ngamin dagiti simngat a kontrobersiya idi nangrugin dagiti pamkuatan ti gobyerno panggep kadagiti tulong para kadagiti minanso ni Covid-19. Naipalagip manen kenni Juan dela Cruz dagiti dinedemonyo wenno sinasairo nga aramid kadagiti naglabas a panawen a sinaplitnatayo manen dagiti delubyo. Nalagip manen dagiti Pinoy dagiti killo a nga eksena tunggal adda relief operations. Adda kano dagiti masukatan a relief items, adda maibulsa kano a gated, adda dagiti agaramat kadagiti nailatang a tulong tapno agpabigbigda nangruna ket umadani manen ti eleksiyon.
Sus maryunes… nababtuog, pards, ti kabangsitan a paset ti relief operations. Adda kano dagitay agiyawat iti relief goods wenno tulong ngem adda kissiiem a kasukatna.
Tay ngay kidday, arikap, abrasa wenno lamano nga adda piselna ken arasaas nga…”dinakto met liplipatan, ah inton 2022.” Dayta kano ti mudos operandi dagiti sairo a kailiantayo. Imbes a tumulong, saan ta inda ketdi agsulisog kadagiti ubbaw ti panunotna a kailiantayo. Ti banglesna, no nayawatan iti relief ni pulano (saan nga amin) kasla insapatanan ti suportana kenni sairo. Nangruna no adda pay kari a cash ken trabaho, agkatayen dagiti nademonyo a kapulitayo. Dita a nayanak ti kunada a: Kupit-2022.
Tsk tsk… nakasaksakit, pards saan aya? Piman dagiti nakaptan ti sakit a Covid-19 ngem ad-adda a piman dagitoy no inka manen idadanes gapu iti nangisit a panggepmo iti pulitika. Isu a kuna dagiti managkararag: “Sapay koma ta madusanto dagdita a sairo iti umay a panungpalan.” Amen!
*** Makasugkar a makapasgar dagiti balikas ken katukad dagiti inyebkas a raem, talek ken saludar ni Pres. Duterte para kadagiti adda iti frontlines kontra Covid-19. Mariknam ti sipupuso a pannakipagrikna ken panangisakit ken repesto nangruna kadagiti nagibusien iti biagda gapu laeng iti akemda iti kagimongan kontra iti Covid-19.
Sinetro ni Pres. Duterte dagiti Health Workers ken dadduma pay a nagsebba iti sungaban ni patay tapno agisalbar laeng iti biag dagiti kailiantayo. Kastatayo koma met, pards. Rebbeng laeng nga intay saluduan ti gappuanan dagiti adda iti sungaban ti gubat kontra Covid-19.
No awanda, amangan ta ad-adu pay a biag ti maipatli a kas koma kadagiti dadduma a nasyon. Dagita dagiti tao nga intay kom a itandudo ken pagtamedan a kas pagwadan ken pagtuladan ti kasukat a puli. Iti likud ti pannakaumsi dagiti dadduma ken naarriek iti trabaho dagiti frontliners…ammotayo a ti sibubukel a pagilian ken kaputotan ket nakasagana a mangimujlanto iti baton-lagip a pakalaglagipan kadakuada… monyumento ti kinabannuar a dinto kalipatan, uray mano pay a Covid ti sumangbay iti laksid ti sinasairo nga aramid dagiti Kupit iti kagimongan.
Agkaykaysatayo ketdi a mangikararag a sapay koma ta maungpoten iti kabiitan a panawen ti saplit a delubyo ni Covid-19. Agtalinaed a sikakapet ken Apo tapno ditay maiwawa iti kasipngetan. Adios mi amor, ciao, mabalos.