Sekyu nga nakapatay sa driver misurender

MISURENDER na ang security guard nga nakapatay sa ambulance driver diha sa lungsod sa Tagoloan, Misamis Oriental.

Patay human gipusil si Sidney G. Sabejon, 49, residente sa maong lungsod, nagtrabaho isip driver sa ambulansya sa St. Paul Hospital.

Gitumbok nga suspetsado mao si Ronnel Luyugoy, 25, gwardya sab sa nanganlan nga balay tambalanan apan human sa insidente misibat ug miadto sa Malitbog.

Niadtong Huwebes mitahan kini sa kapolisan sa Tagoloan Police Station.

Apan nihatag sa iyang bersyon si Luyugoy nganong nahinaykan og pusil si Sabejon kini tungod kay sige kini gapasuko suko kaniya ug kanunay siya nga gasitahon niini.

Unang insidente daw ga-washing siya sa iyang motorsiklo gakasab-an niini apan daw iya lamang nga gapalabyon.

Apan atol sa insidente niabot na gyod sa punto nga daw gihapak siya niini ug giipit hinungdan sa iyang kaulit nga gibati.

“Nung makawala na ako, tsaka na ako bumunot ng baril.” Pagangkon sa suspek ngadto sa mga tigbalita.

Ang suspek gikatakdang magatubang og kasong homicide karong panahona ug nagtingkagol na sa prisuhan karon.

Niadtong Miyerkules mga alas 7:30 sa gabii unang nagkalalis ang duha nga misangpot sa sukmagay. Sunod nga nadungog sa mga kauban sulod sa ospital ang duha ka mga buto sa kalibre 38.

Unang igo sa samin sa ospital ug ikaduhang igo sa ilok nga bahin si Sabejon nga milahos sa iyang dughan maoy hinungdan sa iyang hinanaling kamatayon. SVB