117 ka mga NPA mibalik sa gobyerno

MOABOT na ngadto sa 117 ka mga sakop sa New People’s Army (NPA) ang mibalik sa sabakan sa gobyerno didto sa Cabanglasan, probisnya sa Bukidnon.

Dungan sa ilang pagsurender ang mga armas atubangan kang Cabanglasan Mayor Renante Inocando, 403IB commander Brigadier General Eric Vinoya, Bukidnon provincial police director Senior Superintendent Benedicto Pintor, ug 8th Infantry Battalion commanding officer Lieutenant Colonel Ronald Illana.

Ang mga misurender gilangkuban sa 20 ka miyembro gikan sa NPA’s Militia ng Bayan (MB) kinsa nagsurender sa ilang tulo ka mga high-powered ug 15 low-powered firearms ug moabot sab sa 97 ka miyembreo sa Sanga sa Partido sa Lokalidad (SPL).

Dungan sa ilang pagtahan ilang gipasalig nga motabang sa gobyerno sa kalamboang kalinaw ug subay sab niini ilang gisunog ang flag sa Communist Party of the Philippines-New People’s Army-National Democratic Front (CPP-NPA-NDF).

Padayon sa pagpanawagan ang kasundalohan niadtong mga NPA nga nagpabilin sa ilang kausa nga mobalik na sa gobyerno kay daghang programa nga giandam alang kanila.

“You have made a good decision by rejecting violence and terrorism posed by the CPP-NPA. Now that you have embraced peace, rest assured that the government will assist you through the E-Clip,” kini ang pahayag ni 403IB commander Brigadier General Eric Vinoya ngadto sa mga mitahan.